އިއްޔެއާ އޭގެ ކުރީ ދުވަހު، މާލެ ސަރަހައްދަށް ކުރި ބޯވިއްސާރައިގައި އެންމެ ގިނައިން ވާރޭވެހިފައި ވަނީ، ހުޅުލެއަށް ކަމުގައި، މޯލްޑިވްސް މީޓިއޮރިލޮޖިކަލް ސަރވިސް އިން ހާމަކުރައްވައިފިއެވެ.

މޫސުމާއި ބެހޭ އިދާރާއި ހާމަކޮށްފައިވާ ތަފާސް ހިސާބަށް ބަލާއިރު، 24 ގަޑިއރުގެ ތެރޭގައި އެންމެ ގިނައިން އިއްޔެ ވާރޭ ވެހިފައިވަނީ ހުޅުލެއަށެވެ. ހުޅުލެއަށް އިއްޔެގެ ހެނދުނު 8އިން މެންދުރު ފަހު، 2 ޖެހުމާއި ހަމައަށްވެސް ހަގަޑިއިރުގެ ތެރޭގައި، 95.5 މިލިލީޓަރުގެ ވާރޭވެހުނެވެ. އަދި 24 ގަޑިއރުގެ ތެރޭގައި، 179.7 މިލިލީޓަރުގެ ވާރޭ ހުޅުލެއަށް ވަނީ ވެހިފައެވެ.

އިއްޔެ ހުޅުލެއަށް ބޯކޮށް ވާރޭ ވެހުމުގެ ސަބަބުން، ފްލައިޓްތައް ޑިލޭވެ އެމްއޭސީއެލްއިން ފްލައިޓްތަކަށް ޚިދުމަތް ދިނުމުގައިވެސް ދަތިތަކާއި ކުރިމަތިވިއެވެ. އަދި ހުޅުލެއަށް ނުޖެއްސިގެން ބައެއް ފްލައިޓްތައް ކޮލަމްބޯއަށް ޑައިވާޓްވެސް ކުރަންޖެހުނުކަމުގައި އެމްއޭސީއެލްއިން ހާމަކޮށްފައިވެއެވެ.

ދެވަނައަށް މާލެއަށް އެންމެ ގިނައިން ވާރޭ ވެހުނު އިރު، އިއްޔެގެ ހެނދުނު 8އިން މެންދުރު ފަހު، 2 ޖެހުމާއި ހަމައަށް ހަގަޑިއިރުގެ ތެރޭގައި މާލެއަށްވެސް ، 69.6 މިލިލީޓަރުގެ ވާރޭވެހުނެވެ. އަދި 24 ގަޑިއިރުގެ ތެރޭގައި، މާލެއަށް 118.2 މިލިލީޓަރުގެ ވާރޭ ވެހުނު އިރު، މުޅިމާލޭގައި ފެންބޮޑުވެ ގޭގެއަށް ފެންވަދެ ބައެއް ގޭގޭގައި މީހުންނަށް ދިރިއުޅެވޭވަރު ނުވުމުގެ ސަބަބުން ވަނީ، ވަގުތީ ހިޔާތަކަށް ބަދަަލުކޮށްފައެވެ.

އަތޮޅުތެރޭގެ ރަށްތަކުގެ ތެރެއިން އެންމެ ގިިނައިން އިއްޔެ ވާރޭ ވެހުނުކަމަށް ރެކޯޑްކުރެވިފައި ވަނީ، ބ. ގޮއިދޫއަށެވެ. އެރަށަށް 105.6 މިލިލީޓަރުގެ ވާރޭ ވެހިފައިވެއެވެ.