މާލެ އަތޮޅުންފެށިގެން ވ. އަތޮޅަށް ނެރެފައި އޮތް ޔެލޯ އެލާޓް އޮރެންޖް އެލާޓަކަށް ބަދަލުކޮށް މޫސުމަށް ސަމާލުވުމަށް މޫސުމާއި ބެހޭ އިދާރާއިން އިލްތިމާސްކޮށްފިއެވެ.

މެޓް އޮފީހުން ބުނީ، މިއަދު ހެނދުނު 8ން މެންދުރުފަހު 2އަށް މާލެއަށް 69.6 މިލިލީޓަރުގެ ވާރޭ ވެހުނުކަމަށް ރެކޯޑުކުރެވުނު ކަމަށާއި ހުޅުލެއަށް 95.5 މިލި ލީޓަރުގެ ވާރޭ ވެހުނު ކަމަށެވެ.

މޫސުމާއި ބެހޭ ޤައުމީ އިދާރާއިން 2 ގަޑިއަރަށް އޮރެންޖް އެލާޓް ނެރެފައި ވަނީ، މާލެއަތޮޅާއި އަރިއަތޮޅަށެވެ.

މިއަދު 15:15 އިން 17:15އަށް އޮރެޖް އެލާޓް ނެރެފައި ވަނީ ބޯކޮށްވާރޭ ވެހި ފެންބޮޑުވާނެ ކަމަށް ލަފާކުރެވޭތީއެވެ. މިހާރުވެސް ރެއިންފެށިގެން ވެހެމުންދާ ބޯ ވާރޭގެ ސަބަބުން، މާލެ އާއި ހުޅުމާލެ އަދި މާލެ އަތޮޅާއި ދެކުނުގެ ބައެއް އަތޮޅުތަކުގައި ފެންބޮޑުވެ ގެއްލުންތައް ދަނީ ލިބެމުންނެވެ.

މޫސުމާއި ބެހޭ ޤައުމީ އިދާރާއިން ބުނީ، ވިއްސާރަ މާދަމާއި ހަަމައަށް ދެމިގެންދާނެ ކަމަށްވެސް ލަފާކުރެވޭ ކަމަށެވެ.