ޗައިނާގެ އިތުރުން ފަތުރުވެރިކަމުގެ އެހެން މަންޒިލްތަކަށް ކުރާ ދަތުރުތައް ފުޅާކުރުމަށްޓަކައި މޯލްޑިވިއަންގެ ފްލީޓަށް ވައިޑް ބޮޑީ މަތިންދާ ބޯޓުތައް އިތުރުކުރުމަށް ނިންމައި، ބޯޓު ކުއްޔަށްދޭނެ ފަރާތެއް ހޯދުމަށް އައިލެންޑް އޭވިއޭޝަނުން ޢިއުލާނުކޮށްފިއެވެ.

އައިލެންޑް އޭވިއޭޝަަނުންކޮށްފައިވާ ޢިއުލާނުގައި ބުނެފައިވަނީ، A330-200 އެއާބަސް މަރުކާގެ މަތިންދާ ބޯޓެއް އެކުންފުންޏަށް ކުއްޔަށް ހިފުމަށް ބޭނުންވާ ކަމަށާއި، 5 އަހަރު ދުވަހުގެ މުއްދަތަށް ބޯޓު ކުއްޔަށް ދިނުމަށް ބޭނުންވާ ފަރާތްތަކަށް އެފުރުޞަތު ހުޅުވާލާ ކަމަށެވެ. މިގޮތުން ޖެނުއަރީ މަހުގެ 24 ވަނަ ދުވަހާއި ހަމައަށް ވަނީ އެފުރުޞަތު ހުޅުވާލާފައެވެ.

މިގޮތުން، އައިލެންޑް އޭވިއޭޝަަނުން ބުނެފައި ވަނީ ބޯޓު ކުއްޔަށް ނަގަން ބެނުން ވަނީ ޑްރައި ލީސް އުސޫލުގެ ދަށުން ކަމަށެވެ. އެހެންވެ ބޯޓަށް ތެޔޮއެޅުމާއި މަރާމާތު ކުރުމާއި، ހިންގުމުގެ ހުރިހާ ޚަރަދެއްކުރާނީ އައިލެންޑް އޭވިއޭޝަނުންނެވެ.

Advertisement

ބައިނަލްއަޤުވާމީ ފަރާތްތަކަށް ހުޅުވާާފައިވާ އެފުރުޞަތުގައި ބުނެފައި ވަނީ، ބޯޓުު ކުއްޔަށްދޭ ފަރާތުން އެންމެ ލަސްވެގެން މިފެށޭ އަހަރުގެ ދެވަނަ ކުއާޓަރގައި ބޯޓު އައިލެންޑްއޭވިއޭޝަނާއި ހަވާލުކޮށްދެން ޖެހޭނެ ކަމަށެވެ.

މޯލްޑިވިއަންގެ ފްލީޓަށް އަލަށް މިހޯދާ ބޯޓުވާނީ މިހާތަނަށް އެކުންފުނިން ދުއްވާނެ އެންމެ ބޮޑު ބޯޓަށެވެ. އެއާބަސް A330-200 އަކީ، އެއްފަހަރާ 275 ފަސިންޖަރުން އެރުވޭ އަދި، ދުރު ދަތުރުތަކަށް ޚާއްސަކޮށްފައިވާ ބޯޓެކެވެ. މޯލްޑިވިއަންގެ ފްލީޓްގައި މިހާރު އޮތީ، އެއާބަސް A320ގެ އެއްބޯޓާއި، އޭޓީއާރް 2 ބޯޓާއި، ޑޭޝް-8 މަރުކާގެ 11 ބޯޓެވެ.