ރައްޔިތުންގެ މަޖިލީހުގެ ރައީސްކަމުގެ މަޤާމުން އެމަނިކުފާނު ވަކި ނުކުރެވޭނެކަމަށް ރައީސް ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވީ، އެމަނިކުފާނުގެ އާއިލީ ބޭފުޅެއް ކަމުގައިވާ ރައްޔިތުންގެ މަޖިލީހުގެ ނައިބު ރައީސް އީވާ ޢަބުދުﷲ މަޤާމުން ވަކިކުރުމަށް 50 މެމްބަރުންގެ ސޮޔާއިއެކު މަޖިލީހަށް ހުށައެޅުމުން އެކަމާއި މެދު ކޯފާ އިސްކުރައްވައި، އެމްޑީޕީގެ ޕާލަމެންޓްރީ ގުރޫޕުގެ ވަޓްސްއެޕް ގުރޫޕުގައި ލިޔުއްވާފައިވާ މެސެޖުގައެވެ. 

ރައީސް ނަޝީދު ވަނީ، އީވާގެ އިތުބާރު ނެތްކަމުގެ މައްސަލައިގައި، ރައިސް ޞާލިޙްގެ ކޮއްކޯފުޅު އަދި ރައްޔިތުންގެ މަޖިލީހުގެ ހުޅުމާލެ ދާއިރާގެ މެމްބަރު ޢަލީ ނިޔާޒަށްވެސް ބަހުގެ ހަމަލާއެއް ދެއްވާފައެވެ.

ރައްޔިތުންގެ މަޖިލީހުގެ ނައިބު ރައީސާގެ މަޤާމުން އީވާ ވަކިކުރުމަށް ބޭނުންވަނީ 43 މެމްބަރުންގެ ވޯޓުކަމަށް ވާއިރު، އީވާގެ އިތުބާރު ނެތްކަމުގެ މައްސަލައިގައި 50 މެމްބަރުން ސޮއެކުރައްވާފައިވެއެވެ. 

ރައީސް ނަޝީދު މަޖިލީހުގެ ރައީސް ކަމުގެ މަޤާމުން ވަކި ނުކުރެވޭނެކަމުގައި އެމަނިކުފާނު ވިދާޅުވެފައި ވާއިރު، ރައީސް ނަޝީދުގެ އެވިދާޅުވުން އެއްވެސް އަސާސެއްގެ މައްޗަށް ބިނާކުރައްވާފައެއް ނުވެއެވެ. އެމްޑީޕީގެ މަޖިލިސް މެމްބަރުންގެ ތެރޭގައި 54 މެމްބަރުން ތިއްބަވާއިރު އެމެމްބަރުންގެ ތެރޭގައި ރައީސް ނަޝިދަށް ތާއީދުކުރައްވައިގެން ތިއްބެވި މެމްބަރުންނެއް ނެތެވެ.

ސިޔާސީ މަޝްރަޙް ދިރާސާކުރައްވާ ފަރާތްތަކުން ހާމަކުރައްވާ ގޮތުގައި، ރައީސް ނަޝީދަށްޓަކައި ފިކުރެއްގެ ދިރުމުގައި ހިމެނޭ މެމްބަރުން އެމްޑީޕީން ވަކިވެ، " ދަ ޑިމޮކްރެޓްސް"ގެ ނަމުގައި ސިޔާސީ ޕާޓީއެއް ހަދައި އެޕާޓީގެ ރިޔާސީ ޓިކެޓް ރައީސް ނަޝީދަށް އަރުވަން މަސައްކަތް ކުރާއިރު، އެންމެފަހުން އަމިއްލަ ފުޅަށްވެސް ރައީސް ނަޝީދު އެމްޑީޕީ ދޫކޮށްލައްވާނެއެވެ.

އަދި ރިޔާސީ އިންތިޚާބުގެ ކެންޑިޑެންސީ ހުށައެޅުން ބަންދުވުމުގެ ކުރިން ރައީސް ނަޝީދު އެމްޑީޕީން އަމިއްލަފުލަށް ވަކިވެވަޑައި ނުގެންނެވި ނަމަވެސް، އެމްޑީޕީން ރައީސް ނަޝީދު މަޤާމުން ވަކި ނުކުރާނެކަމުގައިވެސް އެބޭފުޅުން ވިދާޅުވެއެވެ. އަދި ރައީސް ނަޝީދު ބޭނުންފުޅުވަނީ، އެމްޑީޕީން އެމަނިކުފާނު ވަކިކުރެއްވުމުން އިމޯޝަނަލް ސިޔާސީ ޑްރާމާ ކުޅުއްވައިގެން، އިންތިޚާބުގައި  ވާދަކުރެއްވުމުގެ ފުރުޞަތު ހޯއްދެވުމަށްކަމުގައިވެސް ރައްޔިތުންގެ މަޖިލީހުގެ އެމްޑީޕީގެ ބައެއް މެމްބަރުން ވިދާޅުވިއެވެ.

ރައީސް ޞާލިޙާއި ރައީސް ނަޝީދާއި ދެމެދު އުފެދިފައި އޮތް މައްސަލައަކީ ވެރިކަމުގެ މައްސަލަކަމުގައި ރައީސުލްޖުމްހޫރިއްޔާވެސް ވިދާޅުވެފައި ވާއިރު، އެމްޑީޕީގެ ޗެއަރ ޕާސަން ފައްޔާޒު އިސްމާޢީލްވެސް ވިދާޅުވީ، ރައީސް ނަޝީދު އެމްޑީޕީގެ ރިޔާސީ ޓިކެޓް ނޫން އެއްޗެއް ބޭނުންފުޅު ނުވާކަމުގައެވެ.