މުޖުތަމައުގައި އިސް ރަށްވެހިން އަދާކުރާ ދައުރު ފުޅާކުރުމާއި، އިޖުތިމާއީ ކަންކަމުގައި އިސް ރަށްވެހިންނަށް ބައިވެރިވުމުގެ ފުރުސަތު ތަނަވަސްކޮށްދިނުމާއެކު، އިސް ރަށްވެހިންގެ ސިއްހީ ނަފްސާނީ އަދި އިޖުތިމާއީ ދުޅަހެޔޮކަން އިތުރުކޮށްދިނުމުގެ ގޮތުން ޤާއިމްކުރާ އިސްރަށްވެހިންގެ މަރުކަޒުތައް ޤާއިމްކުރުމުގެ މަސައްކަތް ފަށާފައިވާ ކަމުގައި، މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓުން ވިދާޅުވެއްޖެއެވެ.

އެމިނިސްޓްރީން ވިދާޅުވީ، މާލޭސީޓީގައި އިސްރަށްވެހިންނަށް ޚާއްސަ އިޖުތިމާއީ މަރުކަޒެއް ޤާއިމްކުރުމުގެ މަސައްކަތް މިހާރުވަނީ ފަށާފައި ކަމަށެވެ. މިގޮތުން، މި މަރުކަޒު ޤާއިމްކުރުމަށް ނިންމާފައިވަނީ އެންމެ ފަހުން ޤުރުއާނާއި ބެހޭ މަރުކަޒު ހިންގި، މަޖީދިއްޔާ ސްކޫލުގެ އުތުރު ފަރާތުގައި ހުރި ދުވަސްވީ އިމާރާތުގައި ކަމަށްވެސް އެމިނިސްޓްރީން ވިދާޅުވިއެެވެ.

ޤުރުއާނާއި ބެހޭ މަރުކަޒު ހިންގި އެ އިމާރާތަކީ، ރައީސް މުޙައްމަދު އަމީންގެ ވެރިކަމުގެ ކުރިން ފެށިގެން މެދު ނުކެނޑި ބޭނުންކުރަމުން އަންނަތާ 78 އަހަރަށްވުރެ ގިނަ ދުވަސްވެފައިވާ އަދި އެކި ދުވަސްވަރު އެކި ބަދަލުތައް ގެނެސްފައިވާ ޢިމާރާތެކެވެ. އެއިމާރާތަކީ ދިވެހި ތާރީޚުގައި މަޝްހޫރު ނާދީ ތަަމައްދުންއެވެ. އެއިމާރާތް ބިނާކުރެވުނީ، 1945 ވަނަ އަހަރުކަމުގައި ވީނަމަވެސް އެކި ދުވަސްވަރުގައި އެއިމާރާތަށް ބައިތައް އިތުރުކުރެވި، މަރާމާތުކޮށް ބަދަލުތައް ގެނެވިފައިވެއެވެ. އަދި ރައްޔިތުންގެ މަޖިލީހުގެ ޖަލްސާތަކާއި ދައުލަތުގެ ފަރާތުން ބޭއްވި ރަސްމީ މުހިއްމު އެކި ބައްދަލުވުންތައް އެއިމާރާތުގައި ބޭއްވުނު، އަވާހަރަވި ރާނީ ކުއީން އެލިޒަބަތު 2 ވަނަވެސް އެއިމާރާތަށް ޒިޔާރަތްކުރެއްވިއެވެ. އެގޮތުން އެ އިމާރާތަކީ، މާލޭގެ ދޮށީ އުމުރުގެ މީހުންގެ ހަނދާންތަކާއިވެސް ވަރަށް ބޮޑަށް ގުޅިފައިވާ ތާރީޚީ އިމާރާތެކެވެ.

މި އިމާރާތުގެ އާބާތުރަފިލުވުމުގެ މަސައްކަތް ކުރިއަށް ގެންދަނީ، ޤައުމީ ދިފާއީ ބާރުގެ ވެލްފެއާ ކުންފުނި ސިވެކްއާއި ހަވާލުކޮށްކަމުގައިވެސް އިޖްތިމާއީ އަދި އާއިލީ ތަރައްޤީއާއި ބެހޭ ވުޒާރާއިން ވިދާޅުވެއެވެ.މީގެ އިތުރުން މާލޭގައި ޤާއިމްކުރާ އިސްރަށްވެހިންގެ އިޖުތިމާއީ މަރުކަޒަކީ، އިސްރަށްވެހިންގެ އިޖުތިމާއީ މަރުކަޒުތަށް ބިނާކުރުމުގެ މަޝްރޫއުގެ ދަށުން ޤާއިމްކުރާ ފުރަތަމަ މަރުކަޒެވެ. 

މީގެ އިތުރުން، ހުޅުމާލެއާ ފ. ނިލަންދޫ އަދި، އއ. އަތޮޅާއި، ނ. އަތޮޅުގައިވެސް އިސްރަށްވެހިންގެ މަރުކަޒުތައް ޤާއިމް ކުރުމުގެ މަސައްކަތްތައް ކުރަމުންދާކަމުގައި އެމިނިސްޓްރީން ވިދާޅުވެއެވެ. 

އިޖްތިމާއީ އަދި އާއިލީ ތަރައްޤީއާއި ބެހޭ ވުޒާރާއިން ވިދާޅުވީ، މާލޭގައި ޤާއިމްކުރާ އިސްރަށްވެހިންނަށް ޚާއްސަ އިޖުތިމާއީ މަރުކަޒުން ދެވޭ ޚިދުމަތްތައް ފުޅާކޮށް ފެންވަރު ރަނގަޅު ކުރުމަށާއި، ދެމެހެއްޓެނިވި ގޮތެއްގައި މި ތަންތަނުގެ ޚިދުމަތް އިސް ރަށްވެހިންނަށް ފޯރުކޮށްދިނުމަށްޓަކައި އެންސްޕާ، އިންދިރާ ގާންދީ މެމޯރިއަލް ހޮސްޕިޓަލް ފަދަ ގުޅިންހުރި އިދާރާތަކާއި އަމިއްލަ ޖަމުއިއްޔާ ޖަމާއަތްތަކާއި އެކު މަޝްވަރާކޮށް ގުޅިގެން ހިންގޭނެ ޕްރޮގްރާމުތައް ދެނެގަނެ އެކްޓިވިޓީ ކަލަންޑަރެއް ތައްޔާރުކުރުމުގެ މަސައްކަތް ވެސް މިނިސްޓްރީން އަންނަނީ ކުރަމުން ނެވެ.