Advertisement
ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގެ ބައްދަލުވުމެއްގެ ތެރެއިން ---
ހުރިހާ ވަޒީރުންނަށް ރުހުން ދިނުމަށް ކޮމިޓީން ނިންމައިފި
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަޒީރުންގެ މަޖިލީހަށް ޢައްޔަނުކުރައްވާފައިވާ ހުރިހާ މެމްބަރުންނަށް ރުހުންދޭން ނިންމައި، މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން ފާސްކޮށްފިއެވެ.
ވަޒީރުންގެ މަޖިލީހުގެ ހުރިހާ މެމްބަރުންނަށް ރުހުންދިނުމަށް ފާސްކޮށްފައި ވަނީ، ކޮމިޓީގެ އަޣުލަބިއްޔަތުންނެވެ. ކޮމިޓީން ވަޒީރުންގެ މަޖިލީހުގެ ހުރިހާ މެމްބަރުންނަށް، ރުހުން ދިނުމަށް ފެންނަ ކަމަށް ނިންމި ނަމަވެސް ވަޒީރުންގެ މަޖިލީހުގެ މެމްބަރުންނަށް ރުހުންދިނުމަށް މަޖިލީހުގެ ތަޅުމުގައި ވޯޓަށް އެހުމަށް ނިންމާފައި ވަނީ ވަކިވަކީންނެވެ.
ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން އެންމެ ފުރަތަމަ ނިންމާފައި ވަނީވެސް ހުރިހާ ވަޒީރުންނަށްވެސް ރުހުން ދިނުމަށެވެ. އެހެންނަމަވެސް ކޮމިޓީން އެންމެ ފުރަތަމަ މަޖިލީހުގެ ތަޅުމަށް އެރިޕޯޓް ފޮނުއްވިއިރު، ވަޒީރުންގެ މަޖިލީހުގެ މެމްބަރުންނަށް ރުހުންދިނުމަށް އެދިފައި ނުވާތީ އެމައްސަލަ މަޖިލީހުގެ ޖަލްސާއަށް އެޖެންޑާކުރުމަށް ފަހު ވަނީ އަނބުރާ ފޮނުވާލާފައެވެ.
ކޮމިޓީން ވަޒީރުންނަށް ރުހުންދޭން ނިންމި ނަމަވެސް، މަޖިލީހުގެ ދައުރު ނިމި މިހާރު މަޖިލިސް އޮތީ ޗުއްޓީގައެވެ. ވަޒީރުންނަށް ރުހުން ދިނުމަށް ދައުރުން ބޭރުގައި ޖަލްސާއެއް ބާއްވާނެކަމަށް ވަނީ ބެލެވިފައެވެ.
