ރައްޔިތުންގެ މަޖިލީހުގެ ނައިބު ރައީސާ، އީވާ ޢަބުދުﷲ ގެ އިތުބާރު ނެތްކަމުގެ މައްސަލަ ފާސްކޮށް މަޤާމުން ވަކިކުރުމަށް މަޖިލީހަށް މައްސަލަ ވައްދައިފިއެވެ.

ރައްޔިތުންގެ މަޖިލީހުން ވަނީ މިއަދު އެކަން ކަށަވަރުކޮށްދީފައެވެ. މަޖިލީހުގެ އިދާރާއިން ކުރި ޓްވީޓެއްގައި ބުނެފައި ވަނީ، ރައްޔިތުންގެ މަޖިލީހުގެ ނައިބު ރައީސް އީވާ ޢަބްދުﷲ ގެ އިތުބާރު ނެތްކަމުގެ މައްސަލައެއް ރައްޔިތުންގެ މަޖިލީހުގެ އިދާރާއަށް ވަނީ ލިބިފައި ކަމަށާއި، އެ މައްސަލަ ޤާނޫނު އަސާސީއާ ރައްޔިތުންގެ މަޖިލީހުގެ ޤަވާއިދުގައިވާ ގޮތުގެ މަތިން ކުރިއަށްގެންދެވޭނެ ކަމުގައި ދަންނަވާކަމަށެވެ.

އީވާ މަޖިލީހުގެ ނައިބު ރައީސާ ކަމުގެ މަޤާމުން ވަކިކުރަން ބޭނުން ވަނީ، 43 މެމްބަރުންގެ ވޯޓެވެ. އެހެން ނަމަވެސް އެމައްސަލަ އެމްޑީޕީން މަޖިލީހަށް ވެއްދީވެސް އިތުބާރު ނެތްކަމުގެ މައްސަލަ ފާސްކުރެވޭނެ އަދަދަށް ވުރެވެސް އިތުރު މެމްބަރުންގެ ސޮޔާއެކުގައެވެ. މިގޮތުން މަޖިލީހުގައި އެމްޑީޕީގެ 56 މެމްބަރުން ތިއްބަވާއިރު، އީވާގެ އިތުބާރުނެތްކަމުގެ މައްސަލަ މަޖިލީހަށް ވެއްދީވެސް 50 މެމްބަރުންގެ ސޮޔާއެކުގައެވެ. އެހެންކަމުން ރައްޔިތުންގެ މަޖިލީހުގެ ނައިބު ރައީސާގެ މަޤާމުން އީވާ ވަކިކުރާނެ ކަމަކީ ޔަޤީންވާކަމެއް ކަމުގައި ސިޔާސީ ދާއިރާގެ ބޭފުޅުން ވިދާޅުވެއެވެ.

ގަލޮޅު އުތުރު ދާއިރާގެ މެމްބަރު އީވާ ޢަބުދުﷲ ރައްޔިތުންގެ މަޖިލީހުގެ ރިޔާސަތުން ވަކިކުރުމަށް، އެމްޑީޕީން ނިންމީ، އީވާ އެމްޑީޕީން ވަކިވެވަޑައިގެންނެވުމުންނެވެ. އަދި މިހާރު އީވާ މަސައްކަތްކުރައްވަމުން ގެންދަވަނީ އަލަށް އުފައްދަން އުޅޭ ޕާޓީގެ އިސްފަރާތްތަކާއި އެކުގައެވެ.

އީވާ މަޖިލީހުގެ ނައިބު ރައީސާގެ މަޤާމުން ވަކިކުރެއްވުމަށް ހުށައެޅުއްވުމާއި އެކު، ރައީސް ނަޝީދު ވަނީ، އެމްޑީޕީގެ ޕާލަމެންޓްރީ ގުރޫޕުގައި ކޯވެ ބަސްފުޅު ވިދާޅުވެފައެވެ. އަދި ބައެއް އެމްޑީޕީގެ މެމްބަރުންނަށް އިންޒާރުދެއްވާ މޭރުމަކުންވެސް ރައީސް ނަޝިދު ވަނީ އެމްޑީޕީގެ ޕާލަމެންޓްރީ ގުރޫޕުގެ ވަޓްސްއަޕް ގުރޫޕުގައި ލިޔުއްވާފައި ކަމުގައި އެމްޑީޕީއަށް ނިސްބަތްވާ ރައްޔިތުންގެ މަޖިލީހުގެ ބައެއް މެމްބަތުން ވަނީ ވިދާޅުވެފައެވެ. ރައީސް ނަޝީދަށް ރިޔާސީ އިންތިޚާބުގައި ވާދަކުރުމުގެ ފުރުޞަތު ހޯދައި ދިނުމަށް އައު ސިޔާސީ ޕާޓީއެއް އުފެއްދުމުގެ މަސައްކަތް ފިކުރެއްގެ ދިރުމުން ކުރަމުން ގެންދާއިރު، އަދިވެސް ރައީސް ނަޝީދު ހުންނެވީ އެމްޑީޕީގައެވެ. ރައީސް ނަޝީދު އެމްޑީޕީން ވަކިވެވަޑައިނުގެން ހުންނެވީ އެމަނިކުފާނަށް ރައްޔިތުންގެ މަޖިލީހުގެ ރައީސް ކަމުގެ މަޤާމު ގެއްލިވަޑައިގަންނަވާނެތީއެވެ.