މި މަހުގެ 21 ވަނަ ދުވަހު އެމެރިކާގެ ފިލަޑެލްފިއާ އިންޓަނޭޝަނަލް އެއާޕޯޓުން، އެ ގައުމުގެ ފޯޓް މަޔާސް، ފްލޮރިޑާއަށް އޭނާގެ މާމަގެ ކައިރިޔަށް ދަތުރުކުރަން އުޅުނު 6 އަހަރުގެ ކުޑަކުއްޖަކު، ނުބައި ފްލައިޓަކަށް ބޯޑު ކުރެވިގެން އޯލަންޑޯއަށް ފޮނުވާލެވިއްޖެއެވެ. މި ހާދިސާ ހިނގާފައިވަނީ ސްޕިރިޓް އެއާލައިންގެ މުވައްޒަފަކަށް ހެދުނު ގޯހަކުންކަމަށް އެ އެއާލައިނުންވަނީ އެއްބަސްވެފައެވެ.

މިކަމާ ގުޅިގެން އެ އެއާލައިނުން ނެރުނު ސްޓޭޓްމެންޓެއްގައި ބުނީ، މުޅި ދަތުރުގައިވެސް އެ ކުއޖާ ހުރީ އެ އެއާލައިންގެ މުވައްޒަފެއްގެ ބެލުމުގެ ދަށުގައި ކަމަށާއި، އޭނާ ނުބައި ފްލައިޓަކަށް ބޯޑު ކުރެވުނުކަން އެނގުނު ހިސާބުން ފެށިގެން އޭނާގެ އާއިލާއަށް އެކަން އަންގާފައިވާނޭކަމަށެވެ.

ނުބައި ފްލައިޓަށް ބޯޑު ކުރެވުނު ކުޑަ ކުއްޖާ

އެމެރިކާގެ ޓީވީއަކަށް ދިން އިންޓަވިއުއެއްގައި ކުޑަކުއްޖާގެ މާމަ މާރިއާ ރާމޯސް ބުނީ، ފޯޓް މަޔާސްއަށް ޖެއްސި ފްލައިޓުގައި އޭނާގެ މާމަ ދަރި ނެތުމުން ވަރަށް ހާސްވިކަމަށެވެ. ނަމަވެސް އޯލަންޑޯއަށް ޖެއްސުމަށްފަހު ކުޑަ ކުއްޖާ ގުޅިކަމަށް ބުންޏެވެ. އަދި މިހެން ކަންތައް ދިމާވުމުން، ފޯޓް މަޔޭސްއާ 160 މޭލު ދުރުގައި އޮންނަ އޯލަނޑޯއަށް، މާމަދަރިފުޅު ބަލާ ދިޔައީކަމަށް މާރިޔާ ބުންޏެވެ.

މާރިޔާ އިތުރަށް ބުނެފައިވާ ގޮތުގައި އެއާލައިނުންވަނީ ދަރިފުޅު ބަލާ އޯލަންޑޯއަށް ދިޔަ ދަތުރުގެ ހަރަދު ހަމަޖައްސައިދީފައެވެ.

މި މައްސަލަ ބެލުމަށްފަހު ސްޕިރިޓް އެއާލައިނުން ނެރުނު ބަޔާނެއްގައި ބުނީ، މި ހާދިސާ ހިގުމުގައި އިހުމާލުވި މުވައްޒަފު މިހާރު ވަނީ އެ އެއާލައިނުން ވަކިކޮށްފައިކަމަށެވެ.

ސްޕިރިޓް އެއާލައިނަކީ އެކަނި ދަތުރުކުރާ 5 އަހަރާއި 14 އަހަރުގެ ކުޑަކުދިން ވެސް އުފުލައިދޭ އެއާލައިނެކެވެ. އަދި މުޅި ދަތުރުގައި ވެސް އެއާލައިނުން އެކުދިންނަށް ހާއްސަ ސަމާލުކަމެއް ދީ، ބަލަހައްޓާނެ ގޮތުގެ އުސޫލުތަކެއް ކަނޑައަޅާފައިއޮވެއެވެ. ނަމަވެސް ކުޑަކުއްޖަކަށް އެކަނި ދަތުރު ކުރެވޭނީ އެ އުސޫލު ބުނާގޮތުން ގައުމުތެރޭގައި އެކަންޏެވެ. އެހެން ގައުމަކަށް ދަތުރެއް ނުކުރެވެއެވެ.