އައު އަހަރު ފާހަގަ ކުރުމަށް ބާއްވަން ނިންމި "ދިވެހީންގެ ރާއްޖެ ފެސްޓިވަލް 2024"ގެ ރޭގަނޑު ހަރަކާތްތައް ފަސްކުރަން އެކަން އިންތިޒާމުކުރި މިނިސްޓްރީ އޮފް ޔޫތު އެމްޕަވަމަންޓް، އިންފޮމޭޝަން އެންޑް އާޓްސް އިން ނިންމައިފިއެވެ.

މިނިސްޓްރީން މިއަދު ކުރި އިއުލާނެއްގައި ބުނީ އެ ފެސްޓިވަލްގައި ބައިވެރިވުމަށް ރާއްޖޭގެ އެކި ކަންކޮޅުތަކުގައި ތިއްބި ރައްޔިތުންގެ ޝައުގުވެރިކަން ހުރި ކަމަށެވެ.

ނަމަވެސް މެޓް އޮފީހުން ރާއްޖޭގެ ގިނަ ސަރަހައްދުތަކުގައި މޫސުން ގޯސްވާނެ ކަމަށް ލަފާކޮށް ޔެލޯ އެލާޓް ނެރެފާވާތީ ދަތުރުފަތުރު ކުރުމުގައި ދިމާވާނެ ދަތިތަކާ ގުޅިގެން އެ ފެސްޓިވަލްގެ ރޭގަނޑު ބޭއްވުމަށް ހަމަޖެހިފައިވާ ހުރިހާ ހަރަކާތްތަކެއް ފަސްކޮށްފައިވާ ކަމަށް މިނިސްޓްރީން ބުންޏެވެ.

ރޭގަނޑު ބާއްވަން ނިންމީ މިޔުޒިކް ޝޯ، ލޭޒާ ޝޯ އާއި ހަވާ އެރުވުމެވެ. މިއުޒިކް ޝޯ ކުރިއަށް ގެންދަން ރާވާފައި ވަނީ ދިވެހި ފަންނާނުންނަށް ފުރުސަތު ދީގެންނެވެ. މިއުޒިކް ޝޯ ކެންސަލްކޮށްފައިވާއިރު މިކަން ބާއްވަން އިއުލާން ކުރުމާއި ގުޅިގެން ގިނަ ބައެއްގެ ފާޑުކިޔުންވެސް އަމާޒުވިއެވެ. 

މިނިސްޓްރީ އިން ބުނީ މޫސުން ތަންދިންހާ އަވަހަކަށް އެ ހަރަކާތް ބާއްވާނެ ތާރީއެއް އިއުލާނު ކުރާނެ ކަމަށެވެ.