މަތިވެރި ދާއިރާގެ މެމްބަރު ހަސަން ޒަރީރު މަރާލަން އުޅުނު ކަމުގެ ތުހުމަތުގައި ހައްޔަރުކުރި އިބްރާހިމް އަބްދުﷲގެ ބަންދަށް 30 ދުވަސް ޖަހައިފިއެވެ.

ފުލުހުންގެ އިދާރާއިން ވިދާޅުވީ، ކ. މާލެ / މއ. ނައިޓްވިލާ، އިބްރާހީމް ޢަބްދުﷲ (32އ) 30 ދުވަހުގެ މުއްދަތަށް ބަންދުކުރުމަށް ކްރިމިނަލް ކޯޓުން ބަންދުގެ މުއްދަތު ޖަހައިދީފައިވާ ކަމަށެވެ.

ފުލުހުން އޭނާ ހައްޔަރުކުރީ، ފުލުހުން އޭނާ ހޯދުމަށް އާއްމުކޮށް އިޢުލާނުކޮށްފައި ވަނިކޮށް ފިލައިގެން އުޅުމަށް ފަހުގައި، އިއްޔެ އަމިއްލައަށް ފުލުހުންގެ އިދާރާއަށް ހާޟިރު ވުމުންނެވެ.

އޭނާ ހައްޔަރުކޮށްފައި ވަނީ، ރައްޔިތުންގ މަޖިލީހުގެ މަތިވެރި ދާއިރާގެ މެމްބަރު ޒަރީރަށް ހަމަލާދީ މާރާމާރީ ހިންގުމުގައި އޭނާ ބައިވެރިވެފައި ވާތީ އެވެ. އެމައްސަލައިގައި ކޯޓު އަމުރެއްގެ ދަށުން މި މަހުގެ 11 ވނަ ދުވަހުވެސް ފުލުހުން ވަނީ ދިވެހި ދެފިރިހެނަކު ހައްޔަރުކޮށްފައެވެ.

މެމްބަރު ޒަރީރަށް ހަމަލާދީފައި ވަނީ، މިމަހުގެ ފުރަތަމަ ދުވަހުގެ ރޭ، ޓީވީމޯލްޑިވްސްގެ އަނެއްކަންމަތީގައި ހުންނަ، ހަބީބީ ކެފޭ އެންޑް ބިސްޓްރޯތެރޭގައި އިންނަވަނިކޮށެވެ.