ކުރީ ސަރުކާރުން ފެށި އާރްޓީއެލް ފެރީ ނިޒާމް 2 އަހަރު ތެރޭގައި މުޅި ރާއްޖެއަށް ފުޅާ ކުރައްވާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ދިވެހިރާއްޖޭގެ އަޑަށް 61 އަހަރު ފުރުމާއި ގުޅުވައިގެން، މިއަދު ހެނދުނު ދިވެހިރާއްޖޭގެ އަޑުން ގެނެސްދިން "ބާއްޖަވެރި ހެނދުނެއް" ޕްރޮގްރާމްގައި ރޭޑިއޯ އަޑުއެހުންތެރިން ކުރެއްވި ސުވާލުތަކާއި ގުޅޭ ގޮތުން ވާހަކަފުޅު ދައްކަވަމުންނެވެ.

މީގެ އިތުރުން ރައީސުލްޖުމްހޫރިއްޔާ ވިދާޅުވީ، މާލެއާ ވިލިނގިލި އަދި ގުޅީފަޅާއި ތިލަފުށި ހިމެނޭހެން ހަނދަމުންދާ ބްރިޖުގެ މަސައްކަތްވެސް މިހާރުގެ ޝެޑިއުލްއަށްވުރެ އަވަހަށް ނިންމުމަށް މިސަރުކާރުން މަސައްކަތް ކުރަމުންދާކަމަށެވެ. ހަމައެހެންމެ ބޯހިޔާވަހިކަމުގެ މައްސަލަ ޙައްލުކުރުމަށް މާލެއާ މުޅި ރާއްޖޭގައި ކުރަމުންދާ މަސައްކަތްތަކާއެކު މި ފަސްއަހަރުގެ ދަޢުރު ނިމޭއިރު ބޯހިޔާވަހިކަން ނުލިބޭ މީހަކު ނުހުންނާނެކަމަށް އެމަނިކުފާނު ވިދާޅުވަމުންގެންދަވާ ވާހަކަފުޅު ރައީސުލްޖުމްހޫރިއްޔާ ތަކުރާރު ކުރެއްވިއެވެ.

އާރްޓީއެލް ފެރީގެ ނިޒާމަކީ، އަތޮޅުތެރޭގެ ރައްޔިތުންނަށް އެންމެ ބޮޑު ފަސޭހައެއް ލިބިގެން ދިޔަ މަޝްރޫޢެވެ. ވެރިކަން ބަދަލުވި އިރު، ހއ. އަތޮޅާއި، ހދ. އަތޮޅާއި، ށ. އަތޮޅާއި، ޅ. އަތޮޅުގެ އިތުރުން ގއ. އަތޮޅާއި ގދ. އަތޮޅު މިހާރު ވަނީ ހިދުމަތް ދޭން ވަނީ ފަށާފަ އެވެ.