އެމް ޑީ ޕީ ގެ ރަންރީދޫ ލަޝްކަރު ތިބޭނީ އަބަދުވެސް ވަރުގަދަ ޢަޒުމުގައި ހިތްވަރުގެ ކަމަރުބަނދެގެން ކުރިޔަށް މިސްރާބު ޖަހައިގެންކަމުގައި، ނިޝާން ޢިއްޒުއްދީންގެ ޢިއްޒަތުގެވެރިކަން (ނ.ޢ.ޢ.ވ)ގެ ލަޤަބު ދައުލަތުން އަރުވާފައިވާ، އަދި އެމްޑީޕީގެ ފޮރިން މިނިސްޓަރ ޢަބުދުﷲ ޝާހިދު ވިދާޅުވެއްޖެއެވެ.

ޝާހިދު މިހެން ވިދާޅުވީ، އެމްޑީޕީގެ 13 މަޖިލިސް މެމްބަރުން އެމްޑީޕީ ދޫކުރައްވައި، ސަރުކާރު ހިންގާ ޕާޓީ ޕީއެންސީއަށް ސޮއެކުރެއްވުމާއި ގުޅިގެން އެކްސްގައި ލިޔުއްވި ޕޯސްޓެއްގައެވެ.

ޝާހިދު ވިދާޅުވީ، އެމް.ޑީ.ޕީ އަކީ ޑިމޮކްރެޓިކް އުސޫލުތަކުގެ މައްޗަށް ބިނާކޮށް ދިވެހިރައްޔިތުންގެ އުންމީދުތައް ޙާސިލުކޮށް ދިނުމަށް އުފެދި ކުރިއަށްދާ ރާއްޖޭގެ އެންމެ ދުވަސްވީ އެންމެ ފަޚުރުވެރި ޕާޓީކަން މިއަދުވެސް ހަނދާން އެމަނިކުފާނު ހަނދުމަފުޅުކުރައްވާ ކަމަށެވެ. އަދި އެ ޕާޓީ ވަނީ އުފަލާއި ހިތާމަޔާ، ކާމިޔާބީއާއި ނާކާމިޔާބީ ވެސް ތަޖުރިބާކޮށްފައިކަން ޝާހިދު ފާހަގަކުރެއްވިއެވެ.

ރައީސް މައުމޫނާއި އެކު ސިޔާސީ މަސައްކަތްތައް ފެއްޓެވި އަދި ޑީއާރްޕީގައިވެސް އިސް މަޤާމުތަކެއް ފުރުއްވި ޢަބުދުﷲ ޝާހިދު އެމްޑީޕީއާ ގުޅިވަޑައިގެންނެވީ، ވ. ކެޔޮދޫ ދާއިރާގެ މެންބަރުގެ މަޤާމާއި އަދި ރައްޔިތުންގެ މަޖިލީހުގެ ރައީސްގެ މަޤާމުގައި ހުންނަވައިގެން، 18 އޭޕްރީލް 2013 ގައެވެ. އަދި އެމްޑީޕީގެ ޕޯޑިއަމްގައި ޢަބުދުﷲ ޝާހިދު އެންމެ ފުރަތަަމަ ވާހަކަފުޅު ދައްކަވާފައި ވަނީ، 19 އޭޕްރީލް 2013ގައި، އަލިމަސް އުފާ ކާނިވަލްގައި އެމްޑީޕީން "އާބާރެއް"ގެ ނަމުގައި ބޭއްވި ޖަލްސާގައެެވެ.