މިނިސްޓަރ އޮފް އިސްލާމިކް އެފެއާޒް ޑރ އަޙްމަދު ޒާހިރު، ސަޢޫދީ ޢަރަބިއްޔާގެ އިސްލާމިކް މިނިސްޓަރ،  ޝައިޚް ޑރ.އަބްދުއްލަތީފް ބިން ޢަބްދުލް ޢަޒީޒް އަލް އާލް ޝެއިޚްއާ ބައްދަލު  ކުރައްވައިފިއެވެ.

މިބައްދަލު ކުރެއްވުން ބާއްވާފައި ވަނީ، އިސްލާމިކް މިނިސްޓަރ އަޙްމަދު ޒާހިރު ޢަލީ މޮރޮކޯއަށް ކުރައްވަމުން ގެންދަވާ ރަސްމީ ދަތުރުފުޅުގައި، މޮރޮކޯގެ ވެރިރަށް ރަބާތުގައެވެ.

މިބައްދަލުކުރެއްވުމުގައި ދެޤައުމުގެ ދޭތެރޭގައި އޮތް އެކުވެރި ގުޅުން އިތުރަށް ހަރުދަނާކޮށް ދެޤައުމުގެ އިސްލާމިކް މިނިސްޓްރީ ގުޅިގެން ކުރެވެންހުރި މަސައްކަތްތަކާއި ގުޅޭގޮތުން ދެބޭފުޅުންވަނީ މަޝްވަރާކުރައްވާފައި ކަމުގައި މިނިސްޓްރީ އޮފް އިސްލާމިކް އެފެއާޒުން ވިދާޅުވެއެވެ.

ރަސްމީ ދަތުރުފުޅެއްގައި އިސްލާމިކް މިނިސްޓަރ އިސްލާމިކް އެފެއާޒް ޑރ އަޙްމަދު ޒާހިރު މިއަދު މޮރޮކޯއަށް ފުރާވަޑައިގެންނެވީ މިދިޔަ ހުކުރު ދުވަހުގައެވެ.

އިސްލާމިކް މިނިސްޓަރގެ މިދަތުރުފުޅަކީ، 2019 ވަނަ އަހަރު މިނިސްޓްރީ އޮފް އިސްލާމިކް އެފެއާޒް އާއި މޮރޮކޯގެ މިނިސްޓްރީ އޮފް ރިލިޖަސް އެންޑޯމަންޓް އެންޑް އިސްލާމިކް އެފެއާޒް އާއި ދެމެދު “އިސްލާމް ދީން ކުރިއަރުވާ ދީނީ ހޭލުންތެރިކަން އިތުރު ކުރުމުގެ ގޮތުން” ދެގަމު ގުޅިގެން މަސައްކަތް ކުރުމަށްޓަކައި ސޮއިކޮށްފައިވާ އެއްބަސްވުމުގެ ދަށުން ދެޤައުމުގެ ދެމެދުގައި އުފައްދާފައިވާ ޖޮއިންޓް ކޮމިޝަންގެ މެންބަރުންގެ ފުރަތަމަ ބައްދަލުވުން ބޭއްވުމަށްޓަކައި ކުރައްވާ ދަތުރުފުޅެއްކަމުގައި އެމިނިސްޓްރީން ހާމަކުރައްވާފައިވެއެވެ.