މިސަރުކާރަށް ދޮޅުމަސް ވެގެން ދިޔައިރުވެސް، ރާއްޖޭގައި ތިބި އިންޑިއާ ސިފައިންގެ ސީދާ އަދަދެއް ނޭނގުމަކީ، ޤައުމީ ސަލާމަތަށް އޮތް ނުރައްކަލެއް ނޫންކަމުގައި ސަރުކާރުން ބުނެފިއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި، އޮފީހުގެ ޗީފް ސްޕޯކްސްޕަރސަން މުޙައްމަދު ޝަހީބު ވިދާޅުވީ، މިހާތަނަށްވެސް ރާއްޖޭގައި ތިބި އިންޑިއާ ސިފައިންގެ ސީދާ އަދަދު ކަށަވަރު ނުވާކަމަށެވެ. ރާއްޖޭގައި ތިބީ އިންޑިއާގެ 89 ސިފައިން ކަމުގައި އެންމެ ފަހުން ސަރުކާރުން ބުނެފައި ވާއިރު އެއަދަދަށް އުނި އިތުރު އަތުވެދާނެކަމުގައިވެސް ޝަހީބު ވިދާޅުވިއެވެ.

ރާއްޖޭގައި ތިބި އިންޑިއާ ސިފައިންގެ އަދަދު ސަރުކާރަށް ކަށަވަރުނުވުމަކީ އެކަމުގެ ސަބަބުން ޤައުމީ ސަލާމަތަށް އޮތް ނުރައްކަލަކަށް ނުވާނެތޯ ތަަކުރާރުކޮށް، ދައުރު ނޫހުގެ ނޫސްވެރިޔާ ސުވާލުކުރުމުން ޝަހީބު ވިދާޅުވީ، އިންޑިއާ ސިފައިންގެ ޖުމުލަ އަދަދު ކަށަވަރު ނުވެގެން ޤައުމީ ސަލާމަތަށް ނުރައްކަލެއް އޮތްކަމަށް ސަރުކާރުން ނުދެކޭ ކަމަށެވެ.

ޝަހީބު ވިދާޅުވީ، އިންޑިއާ ސިފައިންގެ އަދަދުގެ ގޮތުގައި ރައީސް އޮފީހުން ހާމަކުރާ އަދަދަކީ އެއޮފީހަށް ލިބޭ މައުލޫމާތުގެ މައްޗަށް ބިނާކޮށް ހާމަކުރާ އަދަދެއް ކަމަށެވެ. އަދި އެކަމުގެ ސާފު މައުލޫމާތު އެނގޭނީ ކަމާއި ބެހޭ އިދާރާތަކަށް ކަމުގައި ޝަހީބު ވިދާޅުވިއެވެ.

ރާއްޖޭގައި ތިބި އިންޑިއާ ސިފައިން އެގައުމަށް ފޮނުވާލުމަކީ، ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ރިޔާސީ ވަޢުދެކެވެ. ރިޔާސީ އިންތިޚާބުގެ ތެރޭގައި އެމަނިކުފާނު ވިދާޅުވީ، އިންޑިއާ ސިފައިންގެ އެތައް ހާސް ބަޔަކު ރާއްޖޭގައި ތިބި ކަމަށެވެ. އަދި ހަތިޔާރު އެޅި އިންޑިއާ ސިފައިންވެސް ރާއްޖޭގައި ތިބި ކަމަށްބުނެ އެމަނިކުފާނަށް ތާއީދުކުރާ ފަރާތްތަކުން ވާހަކަތައް ފަތުރާފައިވެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ސަރުކާރަށް ދޮޅުމަސް ވެގެން ދިޔައިރު އަދި މިހާތަނަށް ރާއްޖެއިން އިންޑިއާ ސިފައިންގެ އެންމެ މީހަކުވެސް ފޮނުވާލެވުނު ކަމެއް ސަރުކާރުން ހާމައެއް ނުކުރެއެވެ.

ސަރުކާރުން އެންމެ ފުރަތަމަ ބުނީ ރާއްޖޭގައި ތިބީ އިންޑިއާގެ 77 ސިފައިން ކަމަށެވެ. އެހެން ނަމަވެސް އޭގެފަހުން އެއަދަދު 89އަށް ސަރުކާރުން އިތުރު ކުރީ، އަސްކަރީ ހޮސްޕިޓަލް ސެނަހިޔާގައި މަސައްކަތް ކުރައްވާ އިންޑިއާގެ އަސްކަރީ ސިފައިންގެ ތެރޭގައި ހިމެނޭ ޑޮކްޓަރުން ހިމަނައިގެންނެވެ.