ގަލޮޅު ދަނޑު ހެދުމުގެ މަސައްކަތް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ވެސް ގެންގުޅޭކަމާއި، މިހާރު ކުރިޔަށް ދަނީ އެކަމާ ގުޅިގެން ހަދަންޖެހޭ ދިރާސާތައް ހެދުމުގެ މަސައްކަތްތައް ކަމުގައި، ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސްޕަރސަން މުޙައްމަދު ޝަހީބު މިއަދު ވިދާޅުވެއްޖެއެވެ.

ނޫސްވެރިންނަށް މައުލޫމާތު ދެއްވުމަށް ރައީސް އޮފީހުގައި ބޭއްވެވި ނިއުސް ކޮންފަރެންސްގައި ޝަހީބު އިތުރަށް ވިދާޅުވީ، ރަސްމީ ދަނޑު ހިމެނޭ ސަރަހައްދަކީ ތޮއްޖެހިފައިވާ ސަރަހައްދެއްކަމުން، ގަލޮޅު ދަނޑު މިހާރު ހުރި ސަރަހައްދަކީ ޒަމާނީ ފެންވަރުގެ ސްޓޭޑިއަމެއް ހެދުމަށް އެކަށޭނެ ސަރަހައްދެއްތޯ ބެލުމުގެ މަސައްކަތް ކަމާގުޅުންހުރި އިދާރާތަކުން މިހާރު ކުރައްވަމުން ގެންދަވާކަމަށެވެ.

"ގަލޮޅު ދަނޑު ތަރައްގީ ކުރުމުގެ ކުރީގައި ކަމާބެހޭ ދިރާސާތަކެއް، ކަމާބެހޭ މިނިސްޓްރީއިން ކުރައްވަމުން ގެންދަވާނެ. އަދި ގަލޮޅު ދަނޑު ހިމެނޭ ސަރަހައްދަކީ ތޮއްޖެހިފައިވާ ސަރަހައްދެއްކަމުން، އެ ސަރަހައްދުގައި ދިރިއުޅޭ އާންމު ރައްޔިތުންނާ ވެސް މިކަމާ ގުޅޭ ގޮތުން (ގަލޮޅު ދަނޑު ހިމެނޭ ސަރަހައްދަކީ މިކަމަށް އެންމެ އެކަށޭނަ ސަރަހައްދުތޯ ބެލުމަށް) ސުވާލުކުރާނެ"، ޝަހީބު ވިދާޅުވިއެވެ.

މީގެ އިތުރުން، މި ދިރާސާތައް ނިމޭއިރު، ގަލޮޅު ދަނޑު އެޅުމަށް އެންމެ އެކަށީގެންވަނީ އެ އިމާރާތް މިހާރު ހުރި ބިންތޯ، ނުވަތަ ޖާގައިގެ ގޮތުން ތަނަވެސް އައު ބިމެއްތޯ އެނގިގެންދާނެކަމަށް ޝަހީބު އިޝާރާތްކުރެއްވެވިއެވެ. އަދި ކަމާގުޅުންހުރި މިނިސްޓްރީތަކުން އެކަމާ ގުޅޭ މަޝްވަރާތައް ކުރެއްވުމަށްފަހު، މި މައުޞޫއާ ގުޅޭ އިތުރު ތަފްސީލު ދެއްވާނެކަމުގައި ވެސް ޝަހީބު ވިދާޅުވިއެވެ.

ގަލޮޅު ދަނޑަކީ ގިނަ ދުވަސްތަކެއްވެފައިވާ އިމާރާތެއްކަމުން، އެ ތަނަށް ބޮޑެތި މަރާމާތުތަކެއް ބޭނުންވެއެވެ. މިތަން ތަރައްޤީކުރުމުގައި ރައީސް އިބްރާހިމް މުޙައްމަދު ޞާލިޙްގެ ސަރުކާރުން މިހާރު ހުރި ދުވަސްވީ ދަނޑު އެއްކޮށް ތަޅާލުމަށްފަހު އެތަނުގައި އެންމެފަހުގެ ޒަމާނީ ފުޓުބޯޅަ ސްޓޭޑިއަމެއް ތަރައްޤީކުރައްވާނެކަމަށް އިއުލާންކުރެއްވިއެވެ.

ގަލޮޅު ދަނޑު ތަރައްގީކުރެވިގެންދާނެ ގޮތުގެ 3ޑީ ކުރެހުމެއް

އެ މަސައްކަތް 2022 ވަނަ އަހަރުގެ ބަޖެޓުގައި ހިމަނައި، އޭރުގެ ޔޫތު މިނިސްޓަރ އަޙްމަދު މަޚްލޫފް އައު ގަލޮޅު ދަނޑުގެ 3D ކުރެހުންތަކެއް ވެސް ސޯޝަލް މީޑިއާގައި ހިއްސާކުރެއްވިއެވެ. އެގޮތުން އިންޑިއާގެ އެގްޒިމް ބޭންކުން ދޭ ލޯން އެހީގެ ތެރެއިން، ސާޅީސް ފަސްމިލިއަން، ހަތަރުސަތޭކަ ނުވަދިހަ ހަތަރުހާސް ފައްސަތޭކަ ފަސް ރުފިޔާ ގަލޮޅު ދަނޑު ތަރައްޤީކުރުމަށް ހިމަނާފައިއޮތެވެ. އަދި 2023 ވަނަ އަހަރުގެ ބަޖެޓުގައި 10 މިލިއަން ރުފިޔާ ރަސްމީ ފުޓްބޯޅަ ދަނޑު ތަރައްގީ ކުރުމަށް ހިމަނާފައިއޮތެވެ.

ގަލޮޅު ދަނޑު ތަރައްގީކުރެވިގެންދާނެ ގޮތުގެ 3ޑީ ކުރެހުމެއް

ނަމަވެސް ރައީސް ޞާލިހްގެ ވެރިކަން ނިމުމަކަށް އައިއިރުވެސް ގަލޮޅު ދަނޑުގެ މަސައްކަތް ފެށިފައެއް ނުވެއެވެ.