ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ކުރީގެ ރައީސް ޔާމީނާއި ބައްދަލު ނުކުރައްވަނީ، އެމަނިކުފާނަކީ ޝަރުޢީ ބަންދެއްގައި ހުންނެވި ބޭފުޅަކަށް ވާތީ ކަމުގައި، ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސްޕަރސަން މުޙައްމަދު ޝަހީބު ވިދާޅުވެއްޖެއެވެ.

ޝަހީބު މިހެން ވިދާޅުވީ ސަރުކާރުގެ ކަންކަމާއި ގުޅޭ ގޮތުން މަޢުލޫމާތު، ޙިއްޞާކުރުމަށް ރައީސުލްޖުމްހޫރިއްޔާގެ އޮފީހުން، ބޭއްވި ނޫސްވެރިންގެ ބައްދަލުވުމުގައި ނޫސްވެރިން ކުރިމަތިކުރެއްވި ސުވާލުތަކަށް ޖަވާބު ދެއްވަމުންނެވެ.

ސިޔާސީ އެހެން ލީޑަރުންނާއި ރައީސް ޑރ. މުުއިއްޒު ބައްދަލުކުރައްވާފައި ނުވާ ސަބަބާއިގުޅޭ ގޮތުން ނޫސްވެރިން ސުވާލު ދެންނެވުމުން، ޝަހީބު ވަނީ، ކުރީގެ ރައީސް ޔާމީނާއި ރައީސް ޑރ. މުހައްމަދު މުޢިއްޒު ބައްދަލުކުރެއްވުމަށް ޤާނޫނީ ގޮތުން ހުރަސްތަކެއް އޮތްކަން ދޭހަވާގޮތަށް ވާހަކަފުޅުދައްކަވާފައެވެ. 

ޝަހީބު ވިދާޅުވީ، ރައީސް ޔާމީނަށް އިތުރު ލުއިތަކެއް ނުލިބޭނަމަ އެމަނިކުފާނާއި، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބައްދަލު ނުކުރައްވާނެ ކަމަށެވެ.

ރައީސް ޔާމީނާއި، ޑރ. މުހައްމަދު މުޢިއްޒަށް ބައްދަލުނުރެއްވެނީ، ޤާނޫނީ ހުރަސްތަކެއް އޮތުމުން ކަމުގައި ޝަހީބު ފާހަގަކުރެއްވުމާއި، ގުޅިގެން، ރައީސް ޔާމީންގެ އަނބިކަނބަލުން ފާޠިމަތު އިބްރާހީމާއި ބައްދަލު ރައީސް ޑރ. މުޙައްމަދު މުއިއްޒު ބައްދަލުކުރެއްވިތޯ ސުވާލުކުރެއްވުމުން ޝަހީބު ވިދާޅުވީ، ކުރީގެ ފަސްޓްލޭޑީ ފާޠިމަތު އިބްރާހީމާއި ރައީސް ޑރ މުހައްމަދު މުއިއްޒު ބައްދަލުކުރެއްވިކަން އެނގިވަޑައިނުގަންނަވާ ކަމަށާއި އެކަން ސާފުކުރެއްވުމަށްފަހުގައި ޖަވާބެއް އަރުވާނެ ކަމަށެވެ.

އެހެން ނަމަވެސް "ނޫން.އެމްވީ"އަށް ކަށަވަރުވެފައިވާ ގޮތުގައި ސިޔާސީ ބޭފުޅުންނާއި އެކު ރައީސް ޑރ. މުހައްމަދު މުއިއްޒު ބައްދަލުކުަރައްވަމުން ގެންދަވާއިރު، ރައީސް ޔާމީނާއި ގުޅުންހުރި އެއްވެސް ބޭފުޅަކާއި އަދި އެމަނިކުފާނުގެ މަންދޫބަކާއި އަދި އެމަނިކުފާނުގެ އަނބިކަނބަލުންނާއިވެސް ރައީސް ޑރ. މުހައްމަދު މުޢިއްޒު ބައްދަލުކުރައްވާފައެއް ނުވެއެވެ.