ރައީސާއި ނައިބު ރައީސް ފަސްޓް ކްލާހުގައި ދަތުރުފުޅު ނުކުރައްވާނެކަމުގައި ރައީސުލްޖުމްހޫރިއްޔާ އިއުލާނުކުރައްވާފައި ވާއިރު، ނައިބު ރައީސް އެމަނިކުފާނުގެ އެންމެ ފުރަތަމަ ރަސްމީ ދަތުރުފުޅުގައި ފަސްޓް ކުލާހުގައި ރާއްޖެއިން ބޭރަށް ވަޑައިގެންނެވީ، ބިޒްނަސް ކުލާހުން ޖާގަ ނުލިބިގެން ކަމުގައި ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސްޕަރސަން މުޙައްމަދު ޝަހީބު ވިދާޅުވެއްޖެއެވެ.

ޝަހީބު ވަނީ، މިއަދު ބޭއްވެވި ނޫސްވެރިންގެ ބައްދަލުވުމުގައި، ރައީސުލްޖުމްހޫރިއްޔާގެ ނައިބު ހުސައިން މުޙައްމަދު ލަޠީފް، ޗައިނާއަށާއި ސްވިޒަރލެންޑަށް ކުރެއްވި ދަތުރުފުޅުތަކުގެ ތަފްސީލް މީޑިއާއަށް ހާމަކުރައްވާފައެވެ. 

ރައީސުލްޖުމްހޫރިއްޔާގެ ނައިބު ފަސްޓްކުލާހުގައި ދަތުރުކުރެއްވީ، ޖާގަ ލިބިޑައިނުގަތުމުންކަމުގައި، ޝަހީބު ވިދާޅުވީ، ނައިބު ރައީސް ދަތުރުފުޅު ކުރެއްވީ ފަސްޓް ކުލާހުގައިކަން ފާހަގަކޮށް، ނޫސްތަކުން އެކަން ފާހަގަކުރަން ފެށުމާއި ގުޅިގެން، ރައީސުލްޖުމްހޫރިއްޔާގެ އޮފީހުގައި ނޫސްވެރިންނަށް މައުލޫމާތު ހިއްސާކުރެއްވުމަށް އުފައްދަވާފައިވާ ވަޓްސްއެޕް ގުރޫޕަށް ފޮނުއްވި މެސެޖުގައެވެ.

Advertisement

ރައީސާއި ނައިބު ރައީސް ފަސްޓް ކުލާހުގައި ދަތުރުފުޅު ނުކުރައްވާނެ ކަމަށް، ރައީސް ޑރ. މުހައްމަދު މުޢިއްޒު އިއުލާނުކުރެއްވީ، އެމަނިކުފާނުގެ ފުރަތަމަ ދަތުރުފުޅު ފަސްޓް ކުލާހުގައި ކުރެއްވުމަށްފަހު، މާލެވަޑައިގެން ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައެވެ. އަދި އެމަނިކުފާނުވެސް ފަސްޓްކުލާހުން ދަތުރުފުޅު ކުރެއްވީ ބިޒްނަސް ކުލާހުން ޖާގަ ނުލިބި، ފަސްޓްކުލާހުން ދަތުރުކުރެއްވުމަށް މަޖުބޫރުވެގެންކަން އެމަނިކުފާނު ފާހަގަކުރެއްވިއެވެ.

ރައީސުލްޖުމްހޫރިއްޔާ އިޢުލާނު ކުރެއްވި ގޮތާއި ޚިލާފަށް، ފަސްޓް ކުލާހުގައި ރައީސުލްޖުމްހޫރިއްޔާގެ ނައިބު އެމަނިކުފާނުގެ ފުރަތަމަ ރަސްމީ ދަތުރުފުޅު ކުރެއްވި އިރު އެދަތުރުފުޅުގެ ޓިކެޓަށް އެކަނިވެސް 353،750ރ ޚަރަދުވިކަމަށް ރައީސް އޮފީހުން އާއްމުކުރި ދަތުރުފުޅުގެ ޚަރަދު ހިސާބުތަކުން ދައްކައެވެ. އަދި މުޅި ދެ ދަތުރުފުޅަށް، 3.1 މިލިޔަން ރުފިޔާ ޚަރަދުވެފައިވެއެވެ.