މި މަހުގެ 21 ވަނަ ދުވަހު އައްޑޫ ސިޓީ ގަމުގެ ދެކުނު ފަރާތަށް އިހި ނަގަން އެރި އުޅެނިކޮށް ގެއްލިގެން ހޯދަމުންދާ ސ. މަރަދޫ، ކުރެދުމާގޭ، މުހައްމަދު ނައީޝް ހޯދުމުގެ މަސައްކަތްކުރާތާ މިއަދަށް 7 ދުވަސް ވީއިރުވެސް، އޭނާ ނުފެންނަކަމަށާއި އެހެން ނަމަވެސް ހޯދުމުގެ މަސައްކަތް ހުއްޓާނުލާ ކަމުގައި އެމްއެންޑީއެފުން ބުނެފިއެވެ.

އެމްއެންޑިއެފުން ބުނީ، މުހައްމަދު ނައީޝް ހޯދުމުގެ މަސައްކަތުގައި، މިހާތަނަށް 12303 އަކަ ނޯޓިކަލް މޭލުގެ ސަރަހައްދެއް، ބަލާފައިވާ ކަމަށެވެ. އެގޮތުން، ވައިގެ މަގުން، 9916 އަކަ ނޯޓިކަލް މޭލުގެ ސަރަހައްދެއް ބަލާފައި ވާއިރު ކަނޑުމަތިން، 2386 އަކަ ނޯޓިކަލް މޭލް އަދި ޑައިވްކޮށްގެން، 1 އަކަ ނޯޓިކަލް މޭލުގެ ސަރަހައްދެއް ބަލާފައިވާކަމުގައި، އެމްއެންޑީއެފުން ވަނީ ބުނެފައެވެ.

ނައީޝް ކަނޑަށް ގެއްލުނުފަހުން މިއަދަށް 7 ދުވަސް ވެގެން ދިޔައިރު، ދިރިހުއްޓައި އޭނާ ހޯދިދާނެކަމުގެ އުއްމީދު ވަނީ ފަނޑުވެފައެވެ. އަދި އައްޑޫ ސިޓީއަށް މިހާރު ކުރަމުންދާ ވިއްސާރައިގެ ސަބަބުންވެސް ހޯދުމުގެ މަސައްކަތްތަކަށް ވަނީ ދަތިތަކާއި ކުރިމަތިވެފައި ކަމުގައި މައުލޫމާތު ލިބިފައިވެއެވެ.

ނައީޝް ގެއްލިގެން ހޯދުމުގެ މަސައްކަތުގައި ދައުލަތަށް ލިބިހުރި ހުރިހާ ވަޞީލަތްތަކެއް ބޭނުން ނުހިފި މައްސަލައިގައި ސަރުކާރަށް ވަނީ ފާޑުކިޔުންތައް އަމާޒުވެފައެވެ.