ތިންއަހަރުގެ ތެރޭގައި ހުޅުމާލޭގައި ހުރި ހުރިހާ ބޮޑެތި ފިތުރޯނު ގަސްތައް ކަނޑާލުމަށްނިންމާފައިވާ ކަމުގައި އާބަންކޯއިން ބުނެފިއެވެ.

ހުޅުމާލެ ބަލަހައްޓަމުންދާ ކުންފުނި، އާބަންކޯއިން ބުނީ ހުރިހާ ފިތުރޯނުގަސްތައް ކަނޑާލުމަށް ނިންމާފައި ވަނީ، އެގަސްތަކުގެ ސަބަބުން ހުޅުމާލޭގެ މަގުތަކަށް މިހާރު ގެއްލުންތައް ވަމުންދާތީ ކަމަށެވެ.

ހުޅުމާލެ އާބާދުވިތާ 19 އަހަރު ވިއިރު އެރަށުގައި ހުރި ބޮޑެތި ފިޠުރޯނުގަސްތަކަށްވެސް މިހާރު 20 އަހަރު ވަނީ ވެފައެވެ. 

އާބަންކޯއިން ބުނީ ފިތުރޯނުގަސްތައް ކެނޑުމަށް ފަހު، އެގަހުގެ ބަދަލުގައި އެހެން ބާވަތެއްގެ ގަސްތައް އިންދަމުން ގެންދާނެ ކަމަށެވެ. މިހާރުވެސް އާބަންކޯއިން ވަނީ ހުޅުމާލޭގައި ހުރި ގިނަ އަދަދެއްގެ ބިޔަ ފިތުރޯނު ގަސްތައް ކަނޑާފައެވެ. އެއީ ގަހުގެ މޫތައް ދުވެ މަގުގެ ތާރުކަނޑު ހަލާކުވަމުން ދިޔުމާއި ބިމަށް ފެން ހިންދުމަށް ހަދާފައިވާ ނިޒާމަށް އެކަމުން ގެއްލުން ލިބޭތީއެވެ.

ހުޅުމާލެ އާބާދު ވަމުން އައީސުރެ ހުޅުމާލެ ފިޠުރޯނު މަގަކީ އެމަގުގަިއވާ ގަސްތަކުގެ ސަބަބުން ހުޅުމާލެއަށް ޚާއްސަ ފުރިހަމަކަމެއް ލިބިފައިވާ ގަސްތަކެކެވެ. މިހާރުވެސް ހުޅުމާލެ ފިތުރޯނު މަގުގައި ފެރީޓަރމިނަލް އިން އުތުރަށް އޮންނަ ބައިގައި ހުރި ބޮޑެތި ފިޠުރޯނުގަސްތައް ހުރި ސަރަހައްދަކީ، މީހުން ފޮޓޯ ޝޫޓްތަކަށް ގޮސް އުޅޭ މުހިއްމު ލޮކޭޝަނެކެވެ.