ކުރީގެ ރައީސް އަބުދުﷲ ޔާމީން ޢަބުދުލްޤައްޔޫމް މިނިވަންކުރެއްވެން އޮތީ ޝަރުޢީމަރުހަލާގެ ތެރެއިން ކަމަށާއި، ރައީސް ޑރ. މުޢިއްޒު ވެވަޑައިގެންނެވި ވަޢުދުފުޅު ނޮވެމްބަރު 17ގައި ފުއްދަވާފައިވާކަމުގައި ވިދާޅުވެ، ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސްޕަރސަން މުޙައްމަދު ޝަހީބު އިތުރުފުޅު ހައްދަވައިފިއެވެ.

ރިޔާސީ އިންތިޚާބުގެ ތެރޭގައި، ރައީސް ޑރ. މުޙައްމަދު މުޢިއްޒު ދެއްކެވި ވާހަކަފުޅުގައި ރައީސް ޔާމީނު މިނިވަން ކުރައްވާނެ ކަމަށް ތަކުރާރުކޮށް ވަޢުދުވެވަޑައިގެންނެވިއެވެ. އެހެން ނަމަވެސް އެވާހަކަފުޅުގެ މިސްރާބު މުޅިން ބަދަލުވެ މިއަދުގެ ނޫސްކޮށްފަރެންސްގައި ޝަހީބު ވިދާޅުވީ، ރައީސްކަމުގެ ހުވާ ކުރެއްވި ދުވަހު 17 ނޮވެމްބަރުގައި ރައީސް ދެއްވި ރިޔާސީ ބަޔާނުގައި ވރަށް ސާފު އިބާރާތުން ވިދާޅުވީ ސަރުކާރުން ޖުޑީޝަރީއަށް އަތް ބޭނުން މިވަގުތުން މިވަގުތަށް ނިމުނީކަމަށް ކަމަށެވެ. އެހެންވީމާ، އެ ދުވަހުން ފެށިގެން ސަރުކާރުގެ ފަރާތުން ކޯޓުތަކަށް އަތް ބޭނުން ޝަރީއަތްތަކަށް ނުފޫޒު ފޯރުވުމުގެ މަރުހަލާ އެއޮތީ ނިމިފައިކަމުގައި ޝަހީބު ވިދާޅުވިއެވެ.

ޝަހީބުގެ ވާހަކަފުޅުގައި، ރައީސް ޔާމީނު މިނިވަން ކުރެއްވުމާއި ގުޅޭ ގޮތުން ދެން ސަރުކާރަށް ކުރެވޭނެ ކަމެއް ނެތްކަމުގައި ދޭހަވާ މޭރުމުން ވަނީ ވާހަކަފުޅު ދައްކަވާފައެވެ.

ޝަހީބު ވިދާޅުވީ، ރިޔާސީ އިންތިޚާބު ޑރ. މުއިއްޒަށް ކާމިޔާބުވުމާއި ގުޅިގެން، އޭރުގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ރައީސް ޔާމީން ގެއަށް ބަދަލުކޮށްދެއްވީ، އެކަމަށް ޑރ. މުޙައްމަދު މުޢިއްޒު އެދިވަޑައިގަތުމުން ކަމަށެވެ. އަދި އެކަމަކީ، ކުރީ ސަރުކާރުގެ ހެޔޮފުޅުކަމުން ކުރެއްވި ކަމެއް ނޫންކަމުގައިވެސް ޝަހީބު ވިދާޅުވިއެވެ.

ރައީސް ޔާމީނުގެ ތާއީދާއި ސަޕޯޓާއިއެކު، ޑރ. މުޙައްމަދު މުޢިއްޒު ވެރިކަމަށް ވަޑައިގެން ސަރުކާރަށް ދޮޅުމަސް ވީއިރު ދެބޭފުޅުންގެ ދެމެދުގައި ވަނީ ގުޅުންތައް ގޯސްވެފައެވެ. އަދި ރައީސް ޔާމީން މިނިވަން ކުރުމަށް މިސަރުކާރުން ބޭނުން ނުވާކަން މިހާރު ދަނީ ހާމަވަމުންކަމުގައި ރައީސް ޔާމީނަށް ތާއީދުކުރައްވާ ފަރާތްތަކުން ދަނީ ބުނަމުންނެވެ.