ސަރުކާރާއި ދެކޮޅަށް ފާޑުކިޔައި، ލިޔުންތައް ޝާއިއުކުރަމުން ދިޔަ ދެ އޮންލައިން ނޫހެއް ބްލޮކްކުރީ ކޮން އިދާރާއަކުންކަން ބުނެދެއްވުމަށް ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސް ޕަރސަން މުހައްމަދު ޝަހީބު ދެކޮޅު ހައްދަވައިފިއެވެ.

ސަރުކާރުގެ ކަންކަމާއި ގުޅޭ ގޮތުން މީޑިއާތަކަށް މައުލޫމާތު ދެއްވުމަށް ބޭއްވި ނޫސްވެރިންގެ ބައްދަލުވުމުގައި، ބްލޮކް ކުރި ނޫސްތައް އަން ބްލޮކްކޮށްފިކަން ޝަހީބު އިއުލާނުކުރެއްވުމާއި ގުޅިގެން ކުރިން އެ އޮންލައިން ނޫސްތައް ބަންދުކުރީ ސަރުކާރުންކޮން އިދާރާއަކުން އަންގައިގެންތޯ ނޫސްވެރިން ޝަހީބާއި ސުވާލުކުރިއެވެ. އޭގެ ޖަވާބުގައި ޝަހީބު ވަނީ، އެ ވެބްސައިޓްތައް ބްލޮކް ކުރީ ރައީސުލްޖުމްހޫރިއްޔާގެ އޮފީހުގެ ކޮމިއުނިކޭޝަންސް އޮފީހުން އަންގައިގެން ނޫންކަމުގައި ވިދާޅުވިއެވެ.

ޝަހީބު ވިދާޅުވީ، ބްލޮކްކުރި ނޫސްތައް އަންބްލޮކް ކުރުމަށް ސަރުކާރުން ނިންމީ، އެކަމާއި ގުޅޭ ގޮތުން ކަމާއި ގުޅޭ އިދާރާތަކާއި އެކު ބޭއްވެވި ބައްދަލުކުރެއްވުމަށްފަހުގައި ކުރެއްވުނު މަޝްވަރާތަކަށް ފަހުގައި ކަމަށެވެ. އެހެން ނަމަވެސް ސީދާ ވެބްސައިޓްތައް ބްލޮކްކުރުމުގެ ނިންމުން ނިންމައި އެކަން ތަންފީޒުކުރީ ކޮން އިދާރާއަކުން ކަމެއް ޝަހީބު ވިދާޅެއް ނުވިއެވެ.

ޝަހީބު ވިދާޅުވީ، އެކަން އޮންނާނީ، މިނިސްޓަރ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސް އާދަމް ޝަރީފް ޢުމަރުގެ ބެއްލެވުމުގެ ދަށުގައި ކަމަށެވެ. އެހެން ނަމަވެސް ވެބްސައިޓްތައް ބްލޮކް ކުރީ އެމިނިސްޓްރީން އަންގަވައިގެން ނޫންކަމުގައި އާދަމް ޝަރީފް ވަނީ ވިދާޅުވެފައެވެ.

ސަރުކާރާއި ދެކޮޅަށް ފާޑުކިޔައި ލިޔުންތައް ޝާއިއުކުރަމުން ދިޔަ ނޫހެއް ސަރުކާރުން ބްލޮކް ކުރިއެވެ. އޭގެ ތެރޭގައި ހިމެނެނީ، ރަޖިސްޓްރީ ނުކޮށް ހިންގަމުން އައި ދިޔަވަރު ނޫހާއި، ކުރުސީ ޑޮޓްކޮމްގެ އިތުރުން، ރަޖިސްޓްރީކޮށްގެން ހިންގަމުން އައި ފުރަތަމަ ނޫހެވެ.

ސަރުކާރުން އެޅި އެފިޔަވަޅާއި ގުޅިގެން ފާޑުކިޔުންތައް އަމާޒުވުމުން ސަރުކާރުން ވަނީ، މިހާރު ބްލޮކް ކުރި ހުރިހާ ވެބްސައިޓްތަކެއް އަލުން އަންބްލޮކްކޮށްފައެވެ. ބައެއް ފަރާތްތަކުން ބުނެފައިވާ ގޮތުގައި ސަރުކާރުން ކުރިން ބަންދުކުރި ކަމަށް ބުނި، ބަރަހަނާ ވެބްސައިޓްތައްވެސް މިހާރު ހުރީ އަންބްލޮކްކޮށްފައެވެ.

ސަރުކާރުގެ ސިޔާސަތު ބަދަލުވީތޯ ނޫސްވެރިން ކުރި ސުވާލަށް، ޝަހީބު ސީދާ ޖަވާބެއް ނުދެއްވިއެވެ.