ވަޒީރުންނާ ސުވާލު ކުރުމުގެ ގާނޫނު އުވާލަން އެމްޑީޕީން ރައްޔިތުންގެ މަޖިލީހަށް ހުށަހަޅައިފިއެވެ. މި ހުށައެޅުން ހުށައަޅާފައިވަނީ ހޯރަފުށީ ދާއިރާގެ މެންބަރު އަހުމަދު ސަލީމްއެވެ. މި އިސްލާހު ހުށައެޅުއްވި ސަބަބެއްކަމަށް އޭނާ ވިދާޅުވީ، 2008 ވަނަ އަހަރުގެ ގާނޫނުއަސާސީ ވުޖޫދަށް އައުމުގެ ކުރިން އެކުލަވައި އަމަލު ކުރަމުން އަންނަ ގާނޫނަކަށް ވާތީއެވެ.

ގާނޫނުއަސާސީގެ 98 ވަނަ މާއްދާގައި ވަޒީރުންނާއި ސަރުކާރުގެ މަގާމްތަކުގައި ތިބޭ މީހުންނާ ސުވާލު ކުރުމުގައި އަމަލު ކުރާނެ އުސޫލު ބަޔާން ކޮށްފައިވާ ކަމަށާއި އެ ބޭފުޅުންނަށް ލިޔުމުން ނުވަތަ އަނގަބަހުން ސުވާލު ކުރުމުގެ ހައްގު ކޮންމެ މެންބަރަކަށް ލިބިދީފައިވާ ކަމަށް އެ ބިލުގައިވެއެވެ.

ގާނޫނުއަސާސީ ވުޖޫދަށް ގެނައުމަށް ފަހު ވަޒީރުންނާ ސުވާލު ކުރުމުގެ ގާނޫނަށް އެއްވެސް އިސްލާހެއް ގެނެސްފައި ނުވާ ކަމަށާއި މަޖިލީހުގެ ގަވައިދުގެ 21 ވަނަ ބާބުގައި ވެސް ވަޒީރުންނާ ސުވާލު ކުރުމުގެ އުސޫލުތައް ބަޔާން ކޮށްފައިވާ ކަމަށް އެ ބިލުގައި ބުނެފައި ވެއެވެ. އެހެންވެ ވަޒީރުންނާ ސުވާލު ކުރުމުގެ ގާނޫނުގެ ބޭނުން ނުހިފޭ ކަމަށް އެ ބިލްގައި ވެއެވެ.