އިދިކޮޅު ޕާޓީތަަކުން ފޮރިން މިނިސްޓަރ (ނ.ޢ.އ.ވ) އަބުދުﷲ ޝާހިދުގެ މައްޗަށް ހުށައަޅާފަވާ ޢިތުބާރު ނެތްކަމުގެ މައްސަލައިގައި ޖަވާބުދާރީ ވުމަށް 14 ދުވަހުގެ ނޯޓިސް ފޮނުވާފައިވާ ކަމުގައި ރައްޔިތުންގެ މަޖިލީހުން ބުނެފިއެވެ.

މިކަން އިޢުލާނުކުރައްވާފައި ވަނީ މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި، މަޖިލީހުގެ ނައިބު ރައީސާ އީވާ އަބުދުﷲއެވެ. އީވާ ވިދާޅުވީ، ޝާހިދުގެ އިތުބާރު ނެތްކަމުގެ މައްސަލައިގައި މަޖިލީހުގައި ބަހުސްކުރަން ފެށުމުގެ ކުރިން، ދިވެހިޖުމްހޫރިއްޔާގެ ޤާނޫނު އަސާސީގެ 101 ވަނަ މާއްދާގެ (ށ) އަދި ރައްޔިތުންގެ މަޖިލީހުގެ ޤަވާއިދުގެ  207 ވަނަ މާއްދާގެ (ށ)ވާ ގޮތުގެ މަތިން ފޮނުވަންޖެހޭ ނޯޓިސް 21 މެއިގައި މިނިސްޓްރީ އޮފް ފޮރިން އެފެއާޒަަށް ފޮނުވާފައިވާ ކަމަށެވެ. އަދި އެމައްސަލަ އެޖެންޑާ ކުރާ ދުވަހެއް ފަހުން މެމްބަރުންނަށް އަންގަވާނެ ކަމުގައިވެސް އީވާ ވިދާޅުވިއެވެ.

ޝާހިދުގެ އިތުބާރު ނެތްތަކުގެ މައްސަލަ މަޖިލީހަށް ވެއްދީ، ރައްޔިތުންގެ މަޖިލީހުގެ 13 މެމްބަރަކު ސޮއެކުރައްވައިގެންނެވެ. އޭގެ ތެރޭގައި ހިމެނެނީ ޕީޕީއެމްގެ މެމްބަރުންނާއި، ޕީއެންސީގެ މެމްބަރުންނާއި ޖުމްހޫރީޕާޓީގެ އެއް މެމްބަރެވެ. ޖުމްހޫރީ ޕާޓީގެ މެމްބަރުންގެ ތެރެއިން ޝާހިދު މަޤާމުން ވަކިކުރެއްވުމަށް އިތުބާރުނެތްކަމުގެ މައްސަލައިގައި ސޮއެ ކުރައްވާފައި ވަނީ ކެންދޫ ދާއިރާގެ މެމްބަރު ޢަލީ ޙުސައިނެވެ. 

ފޮރިން މިނިސްޓަރ ޢަބުދުﷲ ޝާހިދުގެ ޢިތުބާރު ނެތްކަމުގެ މައްސަަލަ އެންމެ ފުރަތަމަ 13 މެމްބަރުން ސޮއެކުރައްވައި، މެއި 15 ވަނަ ދުވަހުގެ މެންދުރު ހުށައެޅުއްވުމަށްފަހު ހަމައެދުވަހުގެ ހަވީރުވުމުގެ ކުރިން އެމައްސަލަ އަނބުރާ ނަގާފައިވެއެވެ. އަދި ދެވަނަ ފަހަރަށް ފޮރިން މިނިސްޓަރ ޢަބުދުﷲ ޝާހިދުގެ ޢިތުބާރު ނެތްކަމުގެ މައްސަލަމަޖިލީހަށް ހުށައަޅާފައި ވަނީ މެއި މަހުގެ 18 ވަނަ ދުވަހުގައެވެ.

ފޮރިން މިނިސްޓަރ ޢަބުދުﷲ ޝާހިދުގެ އިތުރުން، ބަންޑާރަ ނައިބު އިބްރާހިމް ރިއްފަތުގެ އިތުބާރު ނެތްކަމުގެ މައްސަލަވެސް ވަނީ އިދިކޮޅު ފަރާތްތަކުން މަޖިލީހަށް ވައްދާފައެވެ. ބައެއް ވަޒީރުންގެ ޢިތުބާރު ނެތްކަމުގެ މައްސަލަ އިދިކޮޅުޕާޓީތަކުން މަޖިލީހަށް ހުށައެޅި ނަމަވެސް ޢިތުބާރުނެތްކަމުގެ ވޯޓު ފާސްކުރެވޭނެވަރުގެ ސާފު އަޣުލަބިއްޔަތެއް މަޖިލީހުގައި އިދިކޮޅު ޕާޓީތަކަކަށް ނެތެވެ.