ރާއްޖޭގެ ދެކުނުގެ އަތޮޅުތަކަށް މިހާރު ކުރަމުންދާ ވިއްސާރައިގައި، އައްޑޫ ސިޓީގައި ފެންބޮޑުވެ އިއްޔެ 97 ގެއަކަށް ފެނުގެ އަސަރުކޮށްފައިވާ ކަމުގައި ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ، (އެން.ޑީ.އެމް.އޭ) އިން ބުނެފިއެވެ.

އެން.ޑީ.އެމް.އޭ ބުނީ، އިއްޔެ ކުރި ވިއްސާރައިގައި އައްޑޫ ސިޓީގެ އިތުރުން ފުވައްމުލަކުގައި ފެންބޮޑުވި ނަމަވެސް ފުވައްމުލަކުގައި އެއްވެސް ގެއަަކަށް ފެންވަދެ ގެއްލުންތައް ލިބުނު ކަމުގެ ރިޕޯޓެއް ނެތް ކަމަށެވެ. އެހެން ނަމަވެސް އައްޑޫ ސިޓީގެ ރަށްތަކުގެ ތެރެއިން 5 ރަށަކުން 97 ގެއަކަށް ފެންވަދެ ގެއްލުންތައް ލިބިފައިވާކަމަށް ރިޕޯޓްކޮށްފައިވާ ކަމުގައި އެން.ޑީ.އެމް.އޭއިން ވަނީ ބުނެފައެވެ.

މިގޮތުން، އައްޑޫ ސިޓީގެ ރަށްތަކުގެ ތެރެއިން އެންމެ ބޮޑަށް ފެންބޮޑުވެ އެންމެ ގިނަ ގޭގެއަށް ފެންވަދެފައި ވަނީ އައްޑޫ ސިޓީ ފޭދޫގައެވެ. ފޭދޫގެ 60 ގެއަަކަށް ފެންވަނެވެ. މީގެ އިތުރުން، މަރަދޫގެ 13 ގެއަކަށާއި، މަރަދޫ ފޭދޫގެ 5 ގެއަކަށާއި، ހިތަދޫގެ 9 ގެއަކަށާއި، ގުޅިފައިވާ ރަށްތަކާއި ވަކިން އޮންނަ ހުޅުދޫގެ 10 ގެއަކަށް ފެންވަދެ ގެއްލުންތައް ލިބިފައިވާ ކަމުގައި ވަނީ ރިޕޯޓްކޮށްފައެވެ.

ފެންބޮޑުވުމާއި ގުޅިގެން އައްޑޫ ސިޓީގައި ޤާއިމްވެ ތިބޭ ސިފައިންނާއި ފުލުހުންނާއި އެހެން މުއައްސަސާތަކުން ގުޅިގެން ވަނީ، ކޯރު ކަނޑައި ފެންހިންދުމާއި، ވެލިބަސްތާ ޖެހުންފަދަ ކަންކަން ކޮށްފައެވެ.

ރާއްޖެއަށް މިހާރު ކުރަމުންދާ ވިއްސާރައިގައި ދެކުނުގެ އަތޮޅުތަކަށް ގުގުރުމާއި އެކު ބޯކޮށް ވާރޭ ވެހި ފެންބޮޑުވާނޭ ކަމަށް ލަފާކޮށް މޫސުމާއި ބެހޭ ޤައުމީ އިދާރާއިން އިއްޔެ އައްޑޫސިޓީ އާ ފުވައްމުލަށް ސިޓީއަށް އޮރެންޖް އެލާޓްވެސް ނެރުނެވެ.