އެމްޑީޕީން ވަކިވެ ވަޑައިގެންނެވި ރައްޔިތުންގެ މަޖިލީހުގެ 12 މެމްބަރުންގެ ނަން، ރައްޔިތުންގެ މަޖިލީހުގެ އެމްޑީޕީގެ ދަފްތަރުން އުނިކޮށްފައިވާކަން ރައްޔިތުންގެ މަޖިލީހުގެ ތަޅުމުގައި, އެކަމާއި މެދު އުފާފާޅުކުރައްވައި، މަޖިލީހުގެ ނައިިބު ރައީސާ އިއުލާނުކޮށްފިއެވެ.

އެމްޑީޕީން ވަކިވެވަޑައިގެންނެވި 12 މެމްބަރުންގެ ނަން މަޖިލީހުގެ އެމްޑީޕީގެ ދަފްތަރުން އުނިކޮށްފައިވާކަން އިޢުލާނުކުރެއްވީ، އެމެމްބަރުންގެ ތެރޭގައި ހިމެނި ވަޑައިގަންނަވާ މެމްބަރު އަދި މަޖިލީހުގެ ނައިބު ރައީސް އީވާ ޢަބުދުﷲ އެެވެ. އީވާ ވިދާޅުވީ އެމެމްބަރުން އެމްޑީޕީން ވަކިވެވަޑައިގެންފިކަން 18 މެއިގައި އަންގަވާފައިވާ ކަމަށެވެ.

މިއަދު ރައްޔިތުންގެ މަޖިލީހުގެ ޖަލްސާ ފެށި އިރު ރިޔާސަތުގައި އިންނެވީވެސް އީވާއެވެ.

އެމްޑީޕީން ވަކިވެވަޑައިގެންނެވި، މަޖިލިސް މެމްބަރުން:

ކުޅުދުއްފުށީ އުތުރު ދާއިރާގެ މެމްބަރު ޔާސިރު އަބްދުއްލަތީފް

މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ

މާފަންނު މެދު ދާއިރާގެ މެމްބަރު އިބްރާހިމް ރަޝީދު

މައްޗަންގޯޅި އުތުރު ދާއިރާގެ މެމްބަރު މުހައްމަދު ރަޝީދު

ގަލޮޅު އުތުރު ދާއިރާގެ މެމްބަރު އީވާ އަބްދުﷲ

ހުޅުދޫ ދާއިރާގެ މެމްބަރު އިލިޔާސް ލަބީބް

ހެންވޭރު ހުޅަނގު ދާއިރާގެ މެމްބަރު ހަސަން ލަތީފް

ވިލިފުށި ދާއިރާގެ މެމްބަރު ހަސަން އަފީފް

ގައްދޫ ދާއިރާގެ މެމްބަރ އަހްމަދު ޒާހިރު

ތޮއްޑޫ ދާއިރާގެ މެމްބަރު ހަސަން ޝިޔާން

އުނގޫފާރު ދާއިރާގެ މެމްބަރު މުހައްމަދު ވަހީދު

މަޑަވެލި ދާއިރާގެ މެމްބަރު ހުސައިން ފިރުޝާން

 މިމެމްބަރުން އެމްޑީޕީން ވަކިވުމާއިއެކު މަޖިލީހުގައި މެމްބަރުން ބެހިފައިވާ ގޮތްވެސް އަލުން ވަނީ އިއުލާނުކޮށްފައެވެ. 

އެމްޑީޕީގައި 55 މެމްބަރުން

ޕީޕީއެމްގައި 5 މެމްބަރުން

ޕީއެންސީގައި 3 މެމްބަރުން

އެމްއެންޕީގައި 3 މެމްބަރުން

ޖޭޕީގައި 2 މެމްބަރުން

އެމްޑީއޭގައި 2 މެމްބަރުން ތިއްބަވާނެއެ. މީގެ އިތުރުން އެމްޑީޕީން ވަކިވެވަޑައިގެންނެވި މެމްބަރުން ހިމެނިވަޑައިގަންނަވަނީ އެއްވެސް ޕާޓީއަކަށް ނިސްބަތްނުވާ މެމްބަރުންގެ ތެރޭގައެވެ. އެއާއެކު ރައްޔިތުންގެ މަޖިލީހުގައި ތިއްބެވި ވަކިޕާޓީއަކަށް ނިސްބަތްނުވާ މެމްބަރުންގެ އަދަދު 17އަށް ވަނީ އަރާފައެވެ.

އެމްޑީޕީން ވަކިވެވަޑައިގެންނެވި މެމްބަރުން އަލަށް އުފައްދާ ދި ޑިމޮކްރެޓްސް އާއި ގުޅިވަޑައިގަންނަވާނެކަމަށް ބެލެވިފައި ވާއިރު، ރައްޔިތުންގެ މަޖިލީހުގައި ދެވަނައަށް އެންމެ ގިނަ މެމްބަރުން ތިބި ޕާޓީއަކަށް އެޕާޓީވެ ރައްޔިތުންގެ މަޖިލީހުގެ މައިނޯރިޓީ ޕާޓީއަށް އެޕާޓީ ވެގެންދާނެއެވެ.

ދި ޑިމޮކްރެޓްސްގެ ނަމުގައި އަލަށް އުފައްދާ ސިޔާސީ ޕާޓީއަކީ ރައީސް ނަޝީދަށް އަލުން ވެރިކަން ހޯއްދައްވައި ދެއްވުމަށްޓަކައި އުފައްދާ ސިޔާސީ ޕާޓިއެއް ކަމަށް ވަނީ ބެލެވިފައެވެ.