މި މަހުގެ 21 ވަނަ ދުވަހު އައްޑޫ ސިޓީ ގަމުގެ ދެކުނު ފަރާތަށް އިހި ނަގަން އެރި އުޅެނިކޮށް ގެއްލިގެން ހޯދަމުންދާ ސ. މަރަދޫ، ކުރެދުމާގޭ، މުހައްމަދު ނާއިޝް ހޯދުމުގެ މަސައްކަތުގައި، މިހާތަނަށް 4,743 އަކަ ނޯޓިކަލް މޭލުގެ ސަރަހައްދެއް، ވަޔާއި ކަނޑާއި އަދި ޑައިވްކޮށްގެން ބަަލާފައިވާ ކަމުގައި އެމްއެންޑީއެފުން ބުނެފިއެވެ.

މިގޮތުން ވައިގެ މަގުން، 3602 އަކަ ނޯޓިކަލް މޭލުގެ ސަރަހައްދެއް ބަލާފައި ވާއިރު ކަނޑުމަތިން، 1140 އަކަ ނޯޓިކަލް މޭލް އަދި ޑައިވްކޮށްގެން، 1 އަކަ ނޯޓިކަލް މޭލުގެ ސަރަހައްދެއް ބަލާފައިވާކަމުގައި، އެމްއެންޑީއެފުން ވަނީ ބުނެފައެވެ.

ރައްޓެހިންތަކަކާއި އެކު އައްޑޫސިޓީ ގަމުގެ ފަރުމައްޗަށް އިހިނަގަން ގޮސް އުޅެނިކޮށް ނައީޝް ގެއްލުނުކަން ރިޕޯޓްކޮށްފައި ވަނީ މިމަހުގެ 21 ވަނަ ދުވަހުގެ ރޭ 22:10 ހާއިރުގައެވެ. އޭނާ ގެއްލުނު ފަހުން 5 ދުވަސްވެފައި ވާއިރު އޭނާ ހޯދުމަށް މިހާތަނަށް ކުރި މަސައްކަތުން އޭނާގެ އެއްވެސް ޚަބަރެއް ވެފައެއް ނުވެއެވެ. 

އޭނާ ހޯދުމުގެ މަސައްކަތުގައި ދައުލަތަށް ލިބިފައިވާ ހުރިހާ ވަސީލަތްތަކެއް ބޭނުން ނުކުރާތީ އެކަމަށް ސިޔާސީ ފަރާތްތަކުންނާއި އާއްމުންވެސް ވަނީ ފާޑުކިޔާފައެވެ.