މީޑިއާގެ ކަންކަން ހަރުދަނާކުރެއްވުމަށާއި، މީޑިއާގެ މަސައްކަތްތަކަށް ފަސޭހަކޮށްދެއްވުމުގެ ގޮތުން، މީޑިއާ ވިލެޖެއް ޤާއިމްކުރެއްވުމަށް ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ނިންމަވައިފިއެވެ.

ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި، އެމަނިކުފާނު މިގޮތަށް ނިންމެވީ އިއްޔެ ބޭއްވެވި ވަޒީރުންގެ މަޖިލީހުގެ ބައްދަލުވުމުގައި މިނިސްޓްރީ އޮފް ޔޫތު އެމްޕަވަރމަންޓް، އިންފޮމޭޝަން އެންޑް އާޓްސް އިން ހުށަހެޅުއްވި ކަރުދާހުގެ މައްޗަށް ވަޒީރުންގެ މެދުގައި މަޝްވަރާކުރެއްވުމަށް ފަހުގައެވެ.

މީޑިއާ ވިލެޖެއް ހެއްދެވުމަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދެކެވެ. މިކަމާއި ގުޅޭ މަސައްކަތްތައް ކުރައްވަމުން ގެންދަނީ، މިނިސްޓްރީ އޮފް ޔޫތު އެމްޕަވަރމަންޓް، އިންފޮމޭޝަން އެންޑް އާޓްސްއާ، ރައީސުލްޖުމްހޫރިއްޔާގެ އޮފީހުގެ ކޮމިއުނިކޭޝަންސް އޮފީހުގެ ބެލުމުގެ ދަށުންނެވެ.

ރައީސުލްޖުމްހޫރިއްޔާގެ އޮފީހުގެ ކޮމިއުނިކޭޝަންސް އޮފީހުން ބޭނުންވި ވަކިވަކި މީޑިއާތަކަށް ދައުވަތު ދެއްވައިގެން، ރޭ ވަނީ ދިވެހިރާއްޖޭގެ އަޑުގެ ސެނެކޯ މާލަމްގައި އެކަމާއި ގުޅޭ ގޮތުން މަޝްވަރާ ބައްދަލުވުމެއްވެސް ބާއްވާފައެވެ.

އެބައްދަލުވުމާއިގުޅޭ ގޮތުން ރައީސުލްޖުމްހޫރިއްޔާގެ އޮފީހުގެ މިނިސްޓަރ އެޓް ދަ ޕްރެޒިޑެންޓްސް އޮފީސް ފޮރ ސްޓްރެޓީޖިކް ކޮމިއުނިކޭޝަން އިބްރާހިމް ޚަލީލު ވިދާޅުވީ، އެބައްދަލުވުމުގައި މައިގަނޑުގޮތެއްގައި ދެކަމެއް ކުރެވުނު ކަމަށާއި އެއްކަމަކީ މީޑިއާތަކުގެ ހުރި ކަންބޮޑުވުންތަކާއި އުދާސްތައް އަޑުއެހުމާއި މީޑިއާގެ ހުރިކަންކަން ހައްލުކުރުމަށް 7 މެމްބަރުންގެ ކޮމިޓީއެއް އެކުލަވާލުން ކަމަށެވެ. އެކޮމިޓީ ވިލަރެސް ކުރައްވާ ވެރިއެއްގެ ގޮތުގައި ސަރުކާރުގެ ފަރާތުން ހުންނަވާނީ، މިނިސްޓަރ އޮފް ޔޫތު އެމްޕަވަރމަންޓް، އިންފޮމޭޝަން އެންޑް އާޓްސް އިބްރާހީމް ވަހީދު ކަމުގައިވެސް ޚަލީލު ވިދާޅުވިއެވެ.

މިސަރުކާރުން އަންގައިގެން ރާއްޖޭގައި ރަޖިސްޓްރީކޮށްފައިވާ ނޫހެއްގެ އޮންލައިން ވެބްސައިޓް ހިމެނޭހެން އިތުރު ދެ ނޫސް ވެބްސައިޓެއް ބަންދުކުރުމުން ސަރުކާރަށް ވަނީ ފާޑުކިޔުންތައް އަމާޒުވެގެން ގޮސްފައެވެ.