ރާއްޖޭގައި ތިބި ބިދޭސީންގެ ތެރެއިން ވޭތުވެދިޔަ އަހަރުގައި މެޑިކަލް ޗެކްއަޕް ހަދާފައިނުވާ މީހުން، ކުރިއަށް އޮތް 6 މަހުގެ ތެރޭގައި މެޑިކަލް ޗެކްއަޕް ހަދަންޖެހޭނެ ކަމަށް ސަރުކާރުން ބުނެފިއެވެ.

ނޫސްވެރިންގެ ބައްދަލުވުމެއްގައި ރައީސް އޮފީހުގެ ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، އަބްދުالله ނާޒިމް ވިދާޅުވީ ރާއްޖޭއިން ނައްތާލާފައިވާ ބަލިތައް ބިދޭސީންގެ ފަރާތުން ފެންނާތީ މިގޮތަށް ނިންމީ އިއްޔެ އޮތް ކެބިނެޓު ބައްދަލުވުމުގައި ކަމަށެވެ.

ނާޒިމް ވިދާޅުވީ، މިހާރު ރާއްޖޭގައި ތިބި ބިދޭސީންގެ ތެރެއިން ވޭތުވެދިޔަ 1 އަހަރު ތެރޭގައި މެޑިކަލް ޗެކްއަޕެއް ހަދާފައި ނުވާ މީހުން، 6 މަސް ދުވަހުގެ ތެރޭގައި ޗެކްއަޕް ހަދައި ނިންމަންޖެހޭނެ ކަމަށެވެ.

މެޑިކަލް ޗެކްއަޕްގެ ނިޒާމު މިހާރަށް ވުރެ ހަރުދަނާކޮށް، ރާއްޖެއަށް ދިގު މުއްދަތަކަށް އަންނަ ބިދޭސީން ރާއްޖެ އަންނަ އިރު، އޮން އެރައިވަލް އަދި މަދުވެގެން އަހަރަކު އެއްފަހަރު މެޑިކަލް ޗެކްއަޕް ހަދަންޖެހޭ ގޮތަށް ނިންމާފައިވާ ކަމަށް ވެސް ނާޒިމް ވިދާޅުވިއެވެ.

ރާއްޖެ އައުމަށްފަހު މެޑިކަލް ޗެކްއަޕް ހެދުމަށް ބިދޭސީންނަށް މިހާރު ދީފައިވާ 30 ދުވަހުގެ މުއްދަތު 15 ދުވަހަށް ކުޑަ ކުރުމަށް ވެސް ކެބިނެޓުން ވަނީ ނިންމާފައެވެ. އަދި ހާއްސަކޮށް އެންޑެމިކް ސަރަހައްދުތަކުން އަންނަ ބިދޭސީން ވިސާ އެކްސްޓެންޑް ކުރަން ބޭނުންވާނަމަ ނުވަތަ އައު ކުރާ ނަމަވެސް، މެޑިކަލް ޗެކްއަޕް ހަދަންޖެހޭ ގޮތަށް ކަނޑައަޅާފައިވާ ކަމަށް ނާޒިމް ވިދާޅުވިއެވެ.