ނޫސް މަޖައްލާތައް ރަޖިސްޓްރީކޮށްދިނުން ހުއްޓާފައިވާކަމަށް ބައެއް މީޑިއާތަކުން ފަތުރާފައިވާ ޚަބަރުތައް މިނިސްޓަރ އޮފް ޔޫތު އެމްޕަވަރމަންޓް، އިންފޮމޭޝަން އެންޑް އާޓްސް، އިބްރާހީމް ވަޙީދު (އަސްވާޑު) ދޮގުކުރައްވައިފިއެވެ.

މިނިސްޓަރ ވިދާޅުވީ، ސަރުކާރުން، ނޫސް މަޖައްލާތައް ރަޖިސްޓްރީކޮށްދިނުން ހުއްޓާލައިފިކަމަށް ބުނެ ދެކެވޭ ވާހަކަތަކަކީ، ތެދު ވާހަކަތަކެއް ނޫން ކަމަށާއި، ނޫސް މަޖައްލާތައް ރަޖިސްޓްރީކޮށް ދިނުމުގެ މަސައްކަތް ހުއްޓައި ނުލައި ކުރިޔަށް ގެންދާކަމަށެވެ. އަދި މިމަހުވެސް 6 ނޫހެއް ރަޖިސްޓްރީކޮށްދީފައިވާ ކަމަށާއި، މިއަދުވެސް، ނޫހެއް ރަޖިސްޓްރީކޮށްދީފައިވާ ކަމުގައި އޭނާ ވިދާޅުވިއެވެ.

އިންފޮމޭޝަން އެންޑް އާޓްސް މިނިސްޓަރ އިބްރާހީމް ވަޙީދު ވިދާޅުވީ، ރަޖިސްޓްރީ ކުރުމަށް ހުށައަޅާފައިވާ ނޫސްތަކުގެ ތެރެއިން މިހާތަނަށް، ރަޖިސްޓްރީކޮށް ނުދެވި އޮތީ، 2 ނޫހެއްކަމަށެވެ.

ރަޖިސްޓްރީ ނުކުރާ ނޫސްތަކެއް ކަމަށް ބުނެ ސަރުކާރުން އަންގައިގެން ނިމުނު ހަފްތާގެ ތެރޭގައި ބައެއް އޮންލައިން ނޫސްތަކަށް ރާއްޖެއިން ނުވަދެވޭނެހެން ސަރުކާރުން ވަނީ ބްލޮކްކޮށްފައެވެ. އަދި ރަޖިސްޓްރީކޮށްގެން ހިންގަމުން އައި ނޫހެއް ކަމުގައިވާ ފުރަތަމަ އޮންލައިންވެސް ސަރުކާރުން ބްލޮކްކުރި ނިއުސް ވެބްސައިޓްތަކުގެ ތެރޭގައި ހިމެނުނު އިރު، ސަރުކާރަށް އަމާޒުވި ފާޑުކިޔުންތަކާއި ފިއްތުންތަކާއި ގުޅިގެން ފަހުން ވަނީ އަންބްލޮކްކޮށްފައެވެ.