މީހަކު ވައްކަން ކުރިކަމަށް ބުނެ އެމީހާއާ މެދު ލާއިންސާނީ އަމަލުތަކެެއް ހިންގި މައްސަލަ ފުލުހުން ބަލަންފަށައިފިއެވެ.

ފުލުހުންގެ އިދާރާއިން ބުނީ، މާފަންނު ފިހާރައަކުން މީހަކު ވައްކަންކުރިކަމަށް ބުނެ އެމީހާ ހިފަހައްޓައިގެން އުޅޭ ކަމުގެ ރިޕޯޓެއް ފުލުހުންނަށް ލިބިފައިވާ ކަމަށެވެ. އަދި އެރިޕޯޓާއި ގުޅިގެން އެސަރަހައްދަށް ފުލުހުން ދިޔައިރު ވައްކަން ކުރިކަމަށް ބުނާ މީހާވެސް އަދި އޭނާ އާއި މެދު ލާއިންސާނީ އަމަލުތައް ހިންގިކަމަށް ބުނާ މީހުންވެސް އެސަރަހައްދު ދޫކޮށް ގޮސްފައިވާ ކަމުގައި ފުލުހުން ބުންޏެވެ.

ފުލުހުންގެ އިދާރާއިން ބުނީ ވައްކަންކުރިކަމަށް ތުހުމަތު ކުރެވުނު މީހާ އާއި އޭނާ އާއިމެދު ލާއިންސާނީ އަމަލުތައް ހިންގި މީހުން ދެނެގަތުމުގެ މަސައްކަތް ކުރަމުންދާ ކަމަށެވެ. މިގޮތުން އެސަރަހައްދުގެ ސީސީޓީވީ ފުޓޭޖްތައް ބަލައިގެން އެމީހުން ހޯދުމުގެ މަސައްކަތް ކުރަމުންދާކަމުގައި ފުލުހުންގެ އިދާރާއިން ވަނީ ބުނެފައެވެ.

ރޭ މާފަންނު ފިހާރައަކުން ވައްކަން ކުރަން އުޅުނު މީހަކު ހިފަހައްޓައި، ބަޔަކު މީހުން ވަނީ އޭނާގެ ގަޔަށް ހުދު ދަވާދުއަޅާފައެވެ. އަދި އެ މީހާއާއި މެދު އެއަމަލު ހިންގާ މަންޒަރު ފެންނަ ވީޑިއޯތައް މިހާރު ސޯޝަލް މީޑިއާގެ އެކި މަންސަތަކުގައި ދަނީ ދައުރުވަމުންނެވެ.