ޤައުމީ އެއަރލައިން މޯލްޑިވިއަންގެ ސީޕްލޭން ދަތުރުތައް ބ. ފުޅަދޫއަށް ފަށައިފިއެވެ. ކޮންމެ ހަފްތާއެއްގެ އާދިއްތަަ އަދި ބުރާސްފަތި ދުވަހު އެ ރަށަށް ސީޕްލޭންގެ ޝެޑިއުލް ދަތުރުތައް ކުރުމަށް  ހަމަޖެހިފައިވާކަމަށް މޯލްޑިވިނުންވަނީ ބުނެފައެވެ.

މިއީ ބ. އަތޮޅުގައި ފަތުރުވެރިކަން ފުޅާވަމުންދާއިރު، އެކަމަށް އެއްބާރުލުން ދިނުމަށް ކުރާ ދަތުރުތަކެއް ކަމަށާއި، ޑިމަންޑާއި އެއްވަރަށް ދަތުރުތައް އިތުރުކުރުމަށް ވިސްނާފައިވާ ކަމަށްވެސް މޯލްޑިވިއަނުން ވަނީ ބުނެފައެވެ. މިއީ މޯލްޑިވިއަނުން ރާއްޖޭގެ ފަތުރުވެރިން ކުރިއެރުވުމަށް ކުރަމުންދާ މަސައްކަތްތަކަށް އެއްބާރުލުން ދިނުމަށް ފަށާ ދަތުރުތަކެއް ކަމަށްވެސް އެ ކުންފުނިން ވަނީ ބުނެފައެވެ. 

ބ. ފުޅަދޫއަށް ފަށާފައިވާ މި ދަތުރުތަކާއެކު ބ. އަތޮޅު ފެހެންދޫ އަދި ގޮއިދޫއަށްވެސް ދަތުރުކުރާ ފަރާތްތަކަށް ގިނަ ލުއިތަކެއް ލިބިގެންދާނެ ކަމަށް މޯލްޑިވިއަނުން ދެކެއެވެ.