ފައިލޭރިއާއަށް ޓެސްޓްކުރުމަށް މާލެ ސަރަހައްދުންގައި ކުރިޔަށްގެންދިޔަ ގެންދާ ފައިލޭރިއާއަށް ސްކްރީން ކުރުމުގެ ޕްރޮގްރާމްގެ ތެރެއިން ފައިލޭރިއާއަށް ޕޮޒިޓިވްވެފައިވާ އިތުރުބަޔަކު ފެނިއްޖެ ކަމުގައި ހެލްތު ޕްރޮޓެކްޝަން އޭޖެންސީ އެޗްޕީއޭއިން ބުނެފިއެވެ.

އެޗްޕީއޭއިން ބުނީ ހުކުރު ދުވަހާއި ހޮނިހިރު ދުވަހު، ހުޅުމާލެ އާއި މާލެ އަދި ވިލިމާލެއާއި ތިލަފުއްޓާއި ގުޅީފަޅުގައި ކުރިޔަށް ގެންދިޔަ ސްކްރީނިން ޕްރޮގްރާމްގެ ތެރެއިން، މާލެ ސަރަހައްދުން އިތުރު 7 މީހުން ފައިލޭރިއާއަށް ޕޮޒިޓިވްވެފައިވާ ކަމަށެވެ. އޭގެ ތެރޭގައި ހިމެނެނީ، ހުޅުމާލެއިން 5 މީހުންނާއި، މާލެއިން އެކަކާއި އަދި ގުޅީފަޅުން އެކެކެވެ. މިއާއެކު މިހާތަނަށް ރާއްޖެއިން ފެނުނު ފައިލޭރިއާ ޕޮޒިޓިވް މީހުންގެ އަދަދު ވަނީ 32އަށް އަރާފައެވެ.

މިހާތަނަށް ފައިލޭރިއާއަށް ޕޮޒިޓިވްވި އެންމެންނަކީވެސް ބިދޭސީންނެވެ.

މިފަހަރު ފެނުނު ފައިލޭރިއާގެ އައުޓްބްރޭކްގައި އެންމެ ފުރަތަމަ ފައިލޭރިއާއަށް ބަޔަކު ޕޮޒިޓިވްވެފައިވާކަން އެނގުނީ، ހދ. ކުޅުދުއްފުށި ސިޓީންނެވެ. އެސިޓީން މިހާތަނަށް 25 މީހުން ވަނީ ފައިލޭރިއާއަށް ޕޮޒިޓިވްވެފައެވެ.

އާއްމުގޮތެއްގައި ފައިލޭރިއާ ޖައްސަނީ ކިއުލެކްސް ނަމަކަށް މަދިރިއެކެވެ. ފައިލޭރިއާ ޖައްސާ ޖަރާސީމް ހަށިގަނޑަށް ވަނުމަށްފަހުގައި ބަލީގެ އަލާމާތްތައް ފެންނަން ފެށުމާއި ދެމެދު 6 އަހަރާއި 8 އަހަރާއި ދެމެދުގެ މުއްދަތެއް ހޭދަވެއެވެ.

ފައިލޭރިއާ ޖެހިފައިވާ ދިވެއްސަކު އެންމެ ފަހުން ފެނިފައި ވަނީ 2004 ވަނަ އަހަރު، ލ. ފޮނަދޫއިންނެވެ.