އުރުގުއޭގެ ހުނަރުވެރި ފޯވާޑް، ލުއިސް ސުއަރޭޒް، އެމެރިކާގެ  އިންޓަމިއާމީއަށް ބަދަލުވެއްޖެކަމަށް އެ ކްލަބުން އިއުލާންކޮށްފިއެވެ. ބްރެޒިލްގެ ގްރެމިއޯއަށް އެއް ސީޒަން ކުޅުމަށްފަހު ސުއަރޭޒް އިންޓަ މިއާމީއަށް ބަދަލުވުމާ ގުޅިގެން، އޭނާ އަނެއްކާވެސް ފެންނާނީ ބާސެލޯނާގައި އެއްކޮށް ކުޅެ ގިނަ ކާމިޔާބީތަކެއް ހޯދި އާޖެންޓީނާގެ ތަރި ލިއޮނަލް މެސީއާއެކުއެވެ. 

އުމުރުން 36 އަހަރުގެ ސުއަރޭޒްވަނީ މިހާތަނަށް ކްލަބާއި ގައުމަށް 500 އަށް ވުރެން ގިނަ ގޯލު ކާމިޔާބުކޮށްދީފައެވެ. އަނިޔާގެ ގިނަ މައްސަލަތަކެއް ކުރިމަތިވި ނަމަވެސް، ސުއަރޭޒްވަނީ އެންމެ ފަހުން ކުޅުނު ގްރެމިއޯގައި މޮޅު ކުޅުމެއް ދައްކާފައެވެ. ލީގުގައި 32 މެޗުން 15 ގޯލު ކާމިޔާބު ކުރިއެވެ. އަދި މުޅި ސީޒަންގައި ގްރެމިއޯއަށް 24 ގޯލު ކާމިޔާބުކޮށްދީފައިވެއެވެ. 

އިންޓަ މިއާމީއަށް ސުއަރޭޒް ސޮއިކޮށްފައި މިވަނީ އެއް އަހަރުގެ ކޮންޓްރެކްޓެއްގައެވެ. އެގޮތުން ފެބުރުއަރީ 21 ގައި ފެށުމަށް ހަމަޖެހުފައިވާ މާސްޓާ ލީގު ސޮކާގައި އޭނާ ފެންނާނެއެވެ.

މި ޓީމުގައި މެސީގެ އިތުރުން ބާސެލޯނާގައި އޭނާއާ އެކީ ކުޅުނު ސާޖިއޯ ބުސްކެޓްސް އަދި ޖޯޑީ އަލްބާ ކުޅުމުން ދިއުމަކީ، އޭނާ އެމެރިކާއަށް ބަދަލުވާން ބޭނުންވި އެއް ސަބަބެވެ. މީގެ އިތުރުން، 2024 ގެ ހޫނު މޫސުމުގައި ދެކުނު އެމެރިކާގެ ގައުމުތަކުގެ މެދުގައި ކުޅޭ “ކޮޕާ އެމެރިކާ” މުބާރާތް އެމެރިކާގައި ބޭއްވުމަށް ހަމަޖެހިފައި އޮތުމަކީ މިކަމުގެ އަނެއް ސަބަބު ކަމުގައި ބެލެވެއެވެ. އޭރުން އެމެރިކާގެ ދަނޑުތަކުގައި ކުޅެ، ގައުމާއި މޫސުމަށް ހޭނުމަށް ސުއަރޭޒްއަށް ފުރުސަތު ލިބޭނެއެވެ.

ގަބޫލު ކުރެވޭ ގޮތުގައި ކޮޕާ އެމެރިކާ 2024 ވެގެން ދާނީ ސުއަރޭޒް ގައުމީ ޓީމާއެކު ފެންނާނެ ފަހު މުބާރާތަށެވެ.