ހުޅުމާލެ ފްލެޓް 53 ކައިރީގައި ފުލުހަކަށް ހަމަލާދީ މާރާމާރީ ހިންގި މައްސަލައިގައި 4 މީހަކު ހައްޔަރުކޮށްފިއެވެ.

މިމާރާމާރީ ހިންގާފައި ވަނީ މިއަދު އިރުއޮއްސި 6:15 ހާއިރުގައެވެ. ގުރޫޕަކުން ހަމަލާދީ މާރާމާރީ ހިންގާފައި ވަނީ، ގަލޮޅު ފުލުހުގައި މަސައްކަތް ކުރާ އެވަގުތު އޮފްޑިއުޓީގައި ހުރި ފުލުހަކަށެވެ.

އެގުރޫޕުން ފުލުސްމީހާއަށް ހަމަލާދީ މާރާމާރީ ހިންގި މަންޒަރު އެސަރަހައްދުގައި ތިބި ބައެއް މީހުންނަށްވެސް ވަނީ ފެނިފައެވެ. އަދި އެގުރޫޕުގެ އަތްދަށުން ސަލާމަތްވެގެން ފުލުސް މީހާ ދުރަށް ދުއްވައިގަތް މަންޒަރުވެސް އެސަރަހައްދުގައި ތިބި ބައެއް މީހުންނަށް ފެނުނެވެ.

އެފުލުސްމީހާއަށް އެގުރޫޕުން ހަމަލާދިން މަންޒަރުތައް އެމަގުގައި ހުރި ސީސީޓީވީ ކެމެރާއަށްވެސް ވަނީ ރެކޯޑްކުރެވިފައެވެ.

މިމާރާމާރީއާ ގުޅޭ ގޮތުން ކޮމިޝަނަރ އޮފް ޕޮލިސް މުހައްމަދު ހަމީދު ކުރެއްވި ޓްވީޓުގައި ވިދާޅުވީ، މާރާމާރީ ހިންގި މަންޒަރު ފެންނަ ވީޑިއޯ ބައްަލަވާފައިވާ ކަމަށާއި، ފުލުސްމީހާ އޭނާގެ ނަފުސް ދިފާާޢުގައި ކުރި މަސައްކަތަށް ތަޢުރީފު ކުރައްވާ ކަމަށެވެ. އަދި މާރާމާރީ ހިންގި މީހުން ހޯދުމުގައި ހުޅުމާލެ ފުލުހުން އެޅި އަވަސް ފިޔަވަޅަށްވެސް ކޮމިޝަނަރ އޮފް ޕޮލިސް މުޙައްމަދު ޙަމީދު ތަޢުރީފު ކުރެއްވިއެވެ.

ފުލުސް މީހާއަށް ހަމަލާދިނުމަށް ފަހު، އެގުރޫޫޕުގެ މީހުން ވަދެފައި ވަނީ ފްލެޓް 53ގައި އެމީހުން އުޅުނު އެޕާޓްމަންޓަށެވެ. އެ އެޕާޓްމަންޓަށް ފުލުހުން ހަމަލާދިން މީހުން ހޯދުމަށް ވަތް އިރު އެތަނުން ޤާނޫނީ އިތުރުކުށްތަކެއް ހިންގަމުން ދިޔަކަންވަނީ ފަޅާއަރާފައި ކަމުގައި މައުލޫމާތު ލިބިފައިވެއެވެ.

މިމާރާމާރީއާ ގުޅޭ އިތުރު ތަފްޞީލެއް ފުލުހުން އަދި ހާމައެއް ނުކުރެއެވެ.