އޮންލައިން ނޫސް ވެބްސައިޓްތައް ސަރުކާރުން ބަންދުކުރަން ފެށުމުން ފާޑުކިޔުންތަކާއި ފިއްތުންތަން ބޮޑުވެ، އެންމެފަހުން ސަރުކާރުން ފަހަތަށް ޖެހި، ފުރަތަމަ ނޫސް އޮންލައިންގެ ވެބްސައިޓް އަންބްލޮކްކޮށްފިއެވެ.

ސަރުކާރުން އަންގައިގެން ރާއްޖޭގެ، ސަރވިސް ޕްރޮވައިޑާ މެދުވެރިކޮށް ސަރުކާރަށް ފާޑުކިޔާ ބައެއް އޮންލައިން ނޫސްތައް ބަންދުކުރުުމަށްފަހު އޭގެ ހުއްޖަތެއްކަމުގައި ދެއްކީ ރެޖިސްޓްރީ ނުކޮށް ނޫސްތައް ހިންގަމުން ދިޔުމެވެ. އަދި އެކަމުގެ ދިފާޢުގައި ރައީސުލްޖުމްހޫރިއްޔާގެ އޮފީހުގެ ތަރުޖަމާނު މުހައްމަދު ޝަހީބު ވިދާޅުވީ، ރަޖިސްޓްރީކޮށްގެން ހިންގާ އެއްވެސް ނޫހެއް ސަރުކާރުން ބަންދު ނުކުރާނެ ކަމަށެވެ.

ސަރުކާރުން ބްލޮކްކުރި އޮންލައިން ނިއުސް ވެބްސައިޓްތަކުގެ ތެރޭގައި، ފުރަތަމަ އޮންަލައިން ނޫސްހިމެނޭ ކަމާއި އެނޫސް ބްލޮކްކުރީ ސަރުކާރުންކަން ހާމަކޮށް މޯލްޑިވްސް ޖާނަލިސްޓް އެސޯސިއޭޝަނުން ބަޔާނެއް ނެރުނެވެ.

ސަރުކާަރަށް އިއްޔެ ކުރިމަތިވި ފާޑުކިޔުންތަކާއި ޕްރެޝަރުތަކާއި އެކު، ރޭ ފުރަތަމަ އޮންލައިން އަންބްލޮކް ކުރި އިރު، އެ ނޫހަށް ވަނީ މީޑިއާގެ ސުރުޚީތަކުން ޖާގަ ލިބި އިތުރު އެތައް ބަޔަކަށް އެނޫސް ތަޢާރަފްވެފައެވެ.

އެނޫސް ސަރުކާރުން ބްލޮކް ކުރި އިރު، އެނޫހުގައި އެންމެ ފަހުން ސަރުކާރުގައި ތިބި އިސްފަރާތްތަކާއި ދެކޮޅަށް ލިޔެފައި ވަނީ، މާލޭ ސިޓީ ކައުންސިލްގެ މާލީ މުޢާމަލާތްތަކާއި ގުޅޭ ގޮތުން، ލިޔެފައިވާ ލިޔުމަކާއި، ހޯމް އެންޑް ލޭންޑް މިނިސްޓަރ ޢަލީ އިހްސާން ބިދޭސީންނާއި ގުޅޭ ގޮތުން ދެއްކެވި ވާހަކަފުޅަށް ލިޔެފައިވާ ލިޔުމެކެވެ.