ރައީސް ޑރ. މުހައްމަދު މުއިއްޒުގެ ކެބިނެޓުގައި ހިމެނޭ ލޯކަލް ގަވަމެންޓު މިނިސްޓަރު އާދަމް ޝަރީފަށް ރައްޔިތުންގެ މަޖިލީހުން ރުހުން ދޭން ޖެހޭ ސަބަބެއް ނުފެންނަ ކަމަށް މަޖިލީހުގެ މެޖޯރިޓީ ކޮންޓްރޯލްކުރާ އެމްޑީޕީގެ ޗެއާޕާސަން ފައްޔާޒު އިސްމާއިލު މިރޭ ވިދާޅުވެއްޖެއެވެ.

ފައްޔާޒު މިހެން ވިދާޅުވީ، ލޯކަލް ގަވަމަންޓް މިނިސްޓަރު އާދަމް ޝަރީފްގެ ބެލުމުގެ ދަށުން ހިންގަމުން އަންނަ ކޮމިއުނިކޭޝަންސް އޮތޯރިޓީ އޮފް މޯލްޑިވްސް (ކޭމް) އިން، ސަރުކާރާ ދެކޮޅު ބައެއް ވެބްސައިޓުތައް ބްލޮކްކޮށްފައިވާ މައްސަލައިގައެވެ. 

އާދަމް ޝަރީފްގެ ވުޒާރާގެ މެންޑޭޓް ތެރޭގައި ކޭމް ހިމެނޭއިރު، ސަރުކާރުން ބަރަހަނާ ސައިޓްތައް ބްލޮކުރަން ފެށިތާ ހަފްތާއެއް ފަހުން ރެއިން ފެށިގެން، ހަބަރުފަތުރާ ތިން ވެބްސައިޓަކަށް ނުވަދެވޭ ގޮތް ވަނީ ހަދާފައެވެ. އެއީ ހިޔާލުފާޅު ކުރަން ހުރަސް އެޅުމުގެ އަމަލެއްގެ ގޮތުގައި ފާހަގަކޮށް، އާންމުންނާއި ސިޔާސީ ޕާޓީތައް އަދި ޖަމިއްޔާތަކުން އަންނަނީ އެކަން ކުށްވެރި ކުރަމުންނެވެ.

މިކަމާ ގުޅިގެން ފައްޔާޒު ރޭ އެކްސްގައި ޝާއިއު ކުރެއްވި ޕޯސްޓެއްގައި ވަނީ އާދަމް ޝަރީފް ކުށްވެރި ކުރައްވައިފައެވެ. އެ ޕޯސްޓުގައި ފައްޔާޒު ވިދާޅުވީ، ކުރީގެ ރައީސް އަބްދުﷲ ޔާމީންގެ ސަރުކާރުގައި އާދަމް ޝަރީފް ޑިފެންސް މިނިސްޓަރަކަށް ހުންނަވައިގެން، މަޖިލީހުގެ ތާރީހުގަ އަލަށް ސިފައިން ވައްދާ މެމްބަރުންނަށް އަނިޔާކުރެއްވިކަމަށެވެ. މިހާރު ކޭމް މެދުވެރިކޮށް ހިޔާލުފާޅުކުރުމުގެ މިނިވަންކަން ނައްތާލުމަށް މަސައްކަތް ފެއްޓެވީކަމަށާއި، ލާމަރުކަޒީ ނިޒާމްވެސް ފުށިދިއްގަރަށް، ރުހުން ދޭންޖެހޭ އެއްވެސް ސަބަބެއް ނުފެންނަކަމަށް ވަނީ ވިދާޅުވެފައެވެ. 

ފައްޔާޒު ވަނީ، ސަރުކާރަށް ފާޑުކިޔާ ވެބްސައިޓުތައް ބްލޮކް ކުރުމަކީ ވަރަށް ނުރައްކާތެރި ސިގްނަލެއްގެ ގޮތުގައި ސިފަކުރައްވައި އެކަމާ ކަންބޮޑުވުން ފާޅުކުރައްވާފައެވެ.