ރަޖިސްޓްރީކޮށްގެން ހިންގާ އޮންލައިން ނޫސްތަކުގެ ވެބްސައިޓްތައް ސަރުކާރުން ބްލޮކް ނުކުރާނެކަމަށް ރައީސުލްޖުމްހޫރިއްޔާގެ އޮފީހުގެ ތަރުޖަމާނު މުޙައްމަދު ޝަހީބު ވިދާޅުވެފައި ވަނިކޮށް، ރާއްޖޭގައި ޤަވާއިދުން ރަޖިސްޓްރީކޮށްގެން ހިންގަމުން އަންނަ ނޫހެއްގެ ވެބްސައިޓެއްވެސް ސަރުކާރުން އަންގައިގެން ބްލޮކްކޮށްފައިވާކަން ހާމަވެއްޖެއެވެ.

ސަރުކާރުން ބްލޮކްކޮށްފައިވާ ވެބްސައިޓްތަކުގެ ތެރޭގައި ރާއްޖޭގައި އޮންލައިންކޮށް ޝާއިއުކުރަމުން އަންނަ ނޫސް "ފުރަތަމަ" ހިމެނޭކަން އެނޫހުގެ ފޭސްބުކް ޕޭޖުގައި ވަނީ ހާމަކޮށްފައެވެ.

ސަރުކާރަށް އެއްމަސް ފުރުނުއިރު ސަރުކާރާއި ދެކޮޅަށް އާއްމުންނާއި ސިޔާސީ ފަރާތްތަކުންނާއި ލިޔުންތެރިންއަންނަނީ ޝުޢޫރުތައް ފާޅުކުރަމުންނެވެ. އަދި ސަރުކާރުގެ ސިޔާސަތުތަކަށް ފާޑުކިޔައި ރާއްޖޭގެ ބޮޑެތި އޮންލައިން ނޫސްތަކުގައިވެސް އަންނަނީ ލިޔުންތައް ޝާއިޢު ކުރަމުންނެވެ.

މިގޮތުން މިވަގުތު މީޑިއާގެ އެންމެ ބޮޑު ސަމާލުކަމެއް ހުއްޓިފައި އޮތީ، ލަންކާގެ ކުންފުންޏަކަށް ބީލަމަކާއި ނުލައި، އަދި އެކުންފުންޏަށް 70 ހެކްޓަރުގެ ބިންދޭގޮތަށް މާލެ އަތޮޅު ދެކުނުބުރީގައި އޮންނަ ފުށިދިއްގަރުފަޅު ހިއްކުމުގެ މައްސަލައެވެ.