މިސަރުކާރަށް ފާޑުކިޔައި ލިޔުންތައް ޝާޢިއުކުރަމުން ދިޔަ ދެ ވެބްސައިޓެއް ސަރުކާރުގެ އެންގުމަށް ބްލޮކްކޮށްފިއެވެ.

ސަރުކާރުން އަންގައިގެން ބުލޮކްކޮށްފައި ވަނީ، ކުރުސީ.ކޮމްގެ ނަމުގަޔާއި، ދިޔަވަރު.ކޮމްގެ ނަމުގައި ހިންގަމުން އައި ދެ ވެބްސައިޓެވެ. 

ވެބްސައިޓްތައް ބްލޮކް ކުރުމާއި ގުޅޭ ގޮތުން ރައީސުލްޖުމްހޫރިއްޔާގެ އޮފީހުގެ ތަރުޖަމާނު މުޙައްމަދު ޝަހީބު ވިދާޅުވީ، ގާނޫނާއި ގަވައިދުތަކުގެ ދަށުން ރާއްޖޭގައި ރަޖިސްޓްރީކޮށްގެން ހިންގާ އެއްވެސް ނޫސް/މަޖައްލާއެއް ސަރުކާރުން ބަންދެއްވެސް އަދި ބްލޮކެއްވެސް ނުކުރާނެ ކަމަށެވެ. އަދި ނޫސްވެރިކަމުގެ މިނިވަންކަން އޭގެ އެންމެ ފުޅާމިނުގައި ދެމެހެއްޓުން މި ސަރުކާރުން ކަށަވަރުކުރާނެ ކަމުގެ ޔަގީންކަން އަރުވާކަމުގައިވެސް ޝަހީބު ކުރެއްވި އެކްސްގައި ލިޔުއްވި ޕޯސްޓްގައި ވިދާޅުވެފައި ވެއެވެ.

ސަރުކާރާއި ދެކޮޅު ލިޔުންތައް ޝާއިއުކުރާ ވެބްސައިޓްތައް މިސަރުކާރުން ބަންދުކުރަން ފެށިއިރު، ފެހި ޤާނޫނު އަސާސީ ވުޖޫދަށް އައިފަހުން މި ސަރުކާރު ފިޔަވައި އެއްވެސް ސަރުކާރަކުން ބަންދުކޮށްފައެއް ނުވެއެވެ.

ދިވެހިޖުމްހޫރިއްޔާގެ ޤާނޫނު އަސާސީގައި އަސާސީ ހައްޤުތަކާއި މިނިވަންކަމުގެ ބާބުގައި، ނޫސްވެރިކަމާއި ޚިޔާލުފާޅުކުރުން ހިމަނާފައި ވަނީ އަސާސީ ޙައްޤެއްގެ ގޮތުގައެވެ.

މިސަރުކާރުވެރިކަމަށް ގެނައުމުގައި، ކުރީ ސަރުކާރާއި ދެކޮޅަށް އަސާސެއް ނެތް ތުހުމަތުތައްކޮށް ލިޔުންތައް ޝާއިޢުކުރަމުން ދިޔަ މީޑިޔާތަކާއި ނޫސްތަކާއި އަދި ނޫސްވެރިންނާއި މެދުވެސް ކުރީ ސަރުކާރުން އެއްވެސް ފިޔަވަޅެއް އަޅާފައެއް ނުވެއެވެ.

ސަރުކާރަށް ފާޑުކިޔާ ދެ ވެބްސައިޓެއް ބަންދުކުރުމާއި ގުޅިގެން ބައެއް ފަރާތްތަކުން ވަނީ އެކަމުގެ ކަންބޮޑުވުން ފާޅުކޮށްފައެވެ.