އައްޑޫ ސިޓީ ގަމުގެ ދެކުނު ފަރާތަށް، އިހި ނަގަން މޫދަށް ފޭބި އުމުރުން 18 އަހަރުގެ ޒުވާނަކު ގެއްލިގެން ހޯދަންފަށައިފިއެވެ.

އެމްއެންޑިއެފުން ހާމަކުރައްވާފައިވާ ގޮތުގައި ގެއްލިގެން ހޯދަމުން ދަނީ، ސ.މަރަދޫ ކުރެދުމާގޭ، މުޙައްމަދު ނައީޝް(18އ)އެވެ. އައްޑޫ ސިޓީ ގަމުގެ ދެކުނު ފަރާތުން އުރަފަށަށް އިހި ނަގަން ފައިބައިގެން އުޅެނިކޮށް އޭނާ ގެއްލުނުކަމުގެ ރިޕޯޓްކޮށްފައި ވަނީ، ރޭ 22:10 ހާއިރުގައިކަމަށް އެމްއެންޑީއެފުން ވަނީ ބުނެފައެވެ.

ގެއްލުނު ޒުވާނާ ހޯދުމުގައި، އެމްއެންޑީއެފް ސަދަން އޭރިއާ ކޮމާންޑް، ކޯސްޓްގާޑް ފޯތު ސްކޮޑްރަންގެ ފާސްޓް އިންޓަރސެޕްޓަރ ކްރާފްޓް "ދޮށިމޭނާ" އާއި "ހާބަރކްރާފްޓް 105"، ޑައިވަރުންގެ ޓީމަކާއެކު މިހާރު އެ ސަރަހައްދުގައި ދަނީ ހަރަކާތްތެރިވަމުކަމުގައިވެސް އެމްއެންޑީއެފުން ވަނީ ބުނެފައެވެ. އޭނާ ހޯދުމަށް ކުރި މަސައްކަތުން މިހާތަނަށް އަދި އޭނާ ފެނިފައެއް ނުވެއެވެ.