ސްޕެނިޝް ލީގުގައި ބުރާސްފަތި ދުވަހުގެ ރޭ އިރާކޮޅު ރިއަލް ބެޓިސް އާއި ޖިރޯނާ ބައްދަލުކުރި މެޗު 1-1 އިން އެއްވަރުވެ، ޖިރޯނާއަށް ހޯދެން އޮތް 2 ޕޮއިންޓު ބީވުމުން، މި މަންޒަރު ޝައުގުވެރިކަމާއެކު ބަލަން ތިބި ރެއާލް މެޑްރިޑުން ނިކުތީ ޑިޕޯޓިވޯ އަލަވޭޒް ބަލިކޮށް، ލީގު ތާވަލުގައި ޖިރޯނާގެ މައްޗަށް ކުރި ހޯދުމަށެވެ. ނަމަވެސް މާ މޮޅު އެޓޭކިންގ ކުޅުމެއް ނުދެއްކުނު މެޑްރިޑަށް 3 ޕޮއިންޓު ހޯދޭވަރުވީ ހަމަކިރިޔާއެވެ.

މެޑްރިޑަށް ޑިޕޯޓިވޯ އަލަވޭޒް ބަލިކުރެވުނީ، މެޗުގެ އިތުރު ވަގުތުގައި އެ ޓީމުގެ ރައިޓް-ބެކް ލޫކަސް ވަޒްކޭޒް ކާމިޔާބު ކުރި ގޯލަކުންނެވެ. މެޑްރިޑަށް ލިބުނު ކޯނަރު ނެގިއިރު އަލާވޭޒްގެ އޭރިޔާ ތެރޭގައި މާކް ނުކޮށް ހުރި ވަޒްކޭޒް ބޯޅަ ގޯލަށް ފޮނުވާލީ ބޮލުންނެވެ. މި މެޗުގައި މެޑްރިޑަށް 7 ޝޮޓު ގޯލަށް ފޮނުވާލެވުނުއިރު، އަމާޒު ކުރެވުނީ 4 ޝޮޓެވެ. 

ރިއަލް ބެޓިސްއާ ޖިރޯނާ ބައްދަލުކުރި މެޗު އެއްވަރުވީ 1-1 އިންނެވެ. މި މެޗުގައި ފުރަގަމަ ލީޑުނެގީ ޖިރޯނާއިންނެވެ. އެއީ އެ ޓީމަށް ލިބުނު ޕެނަލްޓީއަކުން ޑޮވްބީކް ކާމިޔާބު ކުރި ގޯލެކެވެ. ބެޓިސްއިން މެޗު ހަމަހަމަކުރީ މެޗު ނިމެން 2 މިނެޓަށްވެފައި ވަނިކޮށެވެ.

މި ނަތީޖާތަކާއެކީ މެޑްރިޑަށާއި ޖިރޯނާއަށް ވެސް ލިބިފައިވަނީ ޖުމްލަ 45 ޕޮއިންޓެވެ. އެއީ ދެ ޓީމުންވެސް 18 މެޗު ކުޅެގެނެވެ.