ފުޓުބޯޅައިގެ މައި އިދާރާ ފީފާ އާއި ޔޫރަޕްގެ ފުޓުބޯޅަ އިދާރާ ޔޫއެފާ އިން ސުޕާ ލީގު މައްސަލައިގައި ޔޫރަޕިއަން ޔޫނިއަންގެ ގާނޫނާ ހިލާފުވެފައިވާކަމަށް، ޔޫރަޕިއަން ކޯޓް އޮފް ޖަސްޓިސްއިން މިއަދު ނިންމައިފިއެވެ. މި ނިންމުމަކީ ޔޫރަޕްގެ ކްލަބް މުބާރާތްތަކަށާއި ދުނިޔޭގެ ބޮޑެތި ކްލަބްތަކާއި ވަރަށް ބޮޑަށް ގުޅުންހުރި ނިންމުމަކަށް ވެދާނެކަމަށް ބެލެވެއެވެ. 

ޖުވެންޓަސް، ބާސެލޯނާ އަދި ރިއަލް މެޑްރިޑް ފަދަ ޔޫރަޕްގެ ބޮޑެތި ބައެއް ކްލަބްތައް އެކުވެ، ސުޕަ ލީގު އުފައްދަން 2021 ވަނަ އަހަރުގެ އެޕްރީލް މަހު ހުށަހެޅުމުން ފުޓުބޯޅައަށް ތާއީދުކުރާ ގިނަ ބަޔަކު ނުރުހުންވެ، މަގުމަތީ އެއްވުންތައް ވެސް ބޭއްވިއެވެ. އެހެންކަމުން ސުޕަ ލީގު އުފައްދަން ކުރި މަސައްކަތަށް ޔޫއެފާއިން ވަނީ ދެކޮޅު ހަދާފައެވެ. އަދި ޔޫއެފާއިން މިކަމާ ދެކޮޅު ހެދުމުން ނުވަ ކްލަބަކުން މުބާރާތައް ތާއީދު ނުކުރަން ވެސް އޭރު ވަނީ ނިންމާފައެވެ. އެއީ މެންޗެސްޓަރ ޔުނައިޓެޑާއި މެންޗެސްޓަރ ސިޓީއާއި ލިވަޕޫލާއި ޗެލްސީ އާއި ޓޮޓެންހަމް ހޮޓްސްޕާ އާއި އާސެނަލް އާއި އޭސީ މިލާން އާއި އިންޓަމިލާން އާއި އެތުލެޓިކޯ މެޑްރިޑެވެ.

ކޯޓުގެ ނިންމުމާ ގުޅިގެން ސުޕަ ލީގު އުފެއްދުމަށް މަސައްކަތް ކުރުމަށް އުފެއްދި އޭ-22 ކުންފުނިން ބުނެފައިވަނީ ފީފާ އާއި ޔޫއެފާ އިން މަސައްކަތްކުރަނީ ހަމައެކަނި އެ އިދާރާތަކުގެ ބާރު ހިނގާ މުބާރާތްތަކަކަށް އީޔޫގެ މުބާރާތްތައް ހެދުމަށް ކަމަށާއި، އެއީ ގާނޫނާ ހިލާފުކަމެއް ކަމަށެވެ. 

ކޯޓުގެ ނިންމުމާ ގުޅިގެން އޭ-22 އިން ވަނީ ސުޕަ ލީގު ކުރިޔަށް ގެންދަން ރާވާފައިވާ ގޮތް އިއުލާންކޮށްފައެވެ. އެގޮތުން ފިރިހެން ލީގުގައި 64 ޓީމާއި އަންހެން ލީގުގައި 32 ޓީމު ވާދަކުރާނެކަމަށް ބުނެފައިވެއެވެ. އަދި މުބާރާތް ކުޅޭނީ ހަފްތާގެ މެދުތެރޭގައި ކަމަށް ބުނެފައިވުމުން، މިއީ ޗެމްޕިއަންސް ލީގަށް ކުރިމަތިވެދާނެ ގޮންޖެހުމެއްކަމަށް ބެލެވެއެވެ.

ކޯޓުގެ ނިންމުމާ ގުޅިގެން ފީފާ އިން ބުނެފައިވަނީ، މިކަމާ ގުޅޭ ގޮތުން އެ އިދާރާއިން ދެކޭ ގޮތެއް ހާމަކުރާނީ ޔޫއެފާ އާއި ކަމާ ގުޅޭ އެހެނިހެން އިދާރާތަކާ މަޝްވަރާ ކުރުމަށްފަހުގައި ކަމަށެވެ.