ކުރިއަށް އޮތް ޖެނުއަރީ ޓްރާންސްފާ ވިންޑޯގައި އިނގިރޭސިވިލާތުގެ މެންޗެންޓަރ ޔުނައިޓެޑަށް ކުޅެމުން އަންނަ ރަފެއަލް ވެރޭން އަނބުރާ އޭނާގެ ކުރީގެ ކްލަބް، ރިއަލް މެޑްރިޑަށް ގެންދަން އުޅޭކަމުގެ އަޑުތައް ފެތުރިއްޖެއެވެ.

ރިޕޯޓުތައް ބުނާގޮތުން، މެޑްރިޑްގެ ކޯޗު ކާލޯ އެންޗެލޮޓީ އިތުރު ޑިފެންޑަރެއް ހޯދަން ބޭނުންވަނީ އެ ޓީމުގެ ޑިފެންޑަރ ޑޭވިޑް އަލާބާގެ ކަކުލަށް އަނިޔާވެ، ގިނަ ދުވަސްތަކަކަށް އޭނާ ކުޅުމާ ދުރަށް ދާން ޖެހުމާ ގުޅިގެންނެވެ. އެގޮތުން މެޑްރިޑްގައި ހަމައެކަނި މިހާރުތިބި ސެންޓްރަލް ޑިފެންޑަރުންނަކީ ރުޑީގާ އާއި ނާޗޯއެވެ. އެހެންކަމުން އިތުރު ޑިފެންޑަރަކަށް އަނިޔާވުމަކީ މެޑްރިޑަށް ކުރިމަތިވާނެ ވަރަށް ބޮޑު ގޮންޖެހުމެކެވެ.

2011 ވަނަ އަހަރު ފްރާންސްގެ ލެންސްއިން ރެއާލް މެޑްރިޑަށް ބަދަލުވި ވެރޭންވަނީ މެޑްރިޑަށް 360 މެޗު ކުޅެދީ، ޑިފެންޑަރެއްގެ ގޮތުގައި 17 ގޯލު ކާމިޔާބުކޮށްފައެވެ. އަދި އެ ކްލަބާއެކު އޭނާ ވަނީ ސްޕެނިޝް ލީގުގެ 3 ތައްޓާއި، ޗެމްޕިއަންސް ލީގުގެ 4 ތަށި ވެސް ކާމިޔާބުކޮށްފައެވެ.

މެޑްރިޑާއެކު ސްޕެނިޝް ލީގުގައި 10 ސީޒަން ކުޅުމަށްފަހު މެންޗެސްޓަރ ޔުނައިޓެޑަށް އޭނާ ބަދަލުވީ ޖުލައި 2021 ގައެވެ.