މިސަރުކާރުން މަރުގެ ހުކުމް ތަންފީޒް ކުރާނެ ކަމުގައި ހޯމް ލޭންޑް މިނިސްޓަރު އަލީ އިހުސާން ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ހޯމް މިނިސްޓްރީގެ މަސައްކަތްތަކާއި ގުޅޭ ގޮތުން މީޑިއާއަށް މައުލޫމާތު ދެއްވުމަށް މިއަދު އިސްކަންދަރު ކޮށީފައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ.

މިނިސްޓަރ އިޙްސާން ވިދާޅުވީ، މިސަރުކާރަކީ، މަރުގެ ހުކުމް ތަންފީޒް ކުރުމަށް ނިންމާފައި އޮތް ސަރުކާރެއް ކަމަށެވެ. އަދި މަރުގެ ހުކުމް ތަންފީޒް ކުރުމަށްޓަކައި ކުރަންޖެހޭ ކަންކަން ޤާނޫނާއި ޤަވާއިދުގެ ތެރޭގައި ކުރާނެ ކަމުގައިވެސް އިޙްސާން ވިދާޅުވިއެވެ.

ދިވެހިރާއްޖޭގައި މަރުގެ ހުކުމް ތަންފިޒް ކުރުމަށް ރައީސް ޔާމީނުގެ ސަރުކާރުގައި ގިނަ މަސައްކަތްތަކެއް ކުރިއެވެ. މިގޮތުން ލީތަލް އިންޖެކްޝަނެއް ޖަހައިގެން މަރުގެ ޙުކުމް ތަންފީޒްކުރުމަށް އެކަމަށް ޚާއްސަ ކޮޓަރިއާ އެނދުވެސް މާފުށީ ޖަލުގައި ޤާއިމްކުރިއެވެ. އެހެންނަމަވެސް ރައީސް ޔާމީނުގެ ސަރުކާރު ނިމިގެން ދިޔައިރުވެސް ރާއްޖޭގައި އެއްވެސް މީހެއްގެ މައްޗަށް މަރުގެ ޙުކުމް ތަންފީޒްކޮށްފައެއް ނުވެއެވެ.

މަރުގެ ހުކުމް ތަންފީޒް ކުރެވޭނީ ޝަރުޢީ ތިން މަރުޙަލާ ނިމިފައިވާ މީހުންގެ މައްޗަށް ކަމަށްވާއިރު، ދިވެހިރާއްޖޭގެ ސްކްރީމްކޯޓުން މަރުގެ ޙުކުމް ދަމަހައްޓާފައިވާ 4 މީހަކު މާފުށީ ޖަލުގައި ބަންދުކޮށްފައި އެބަތިބެވެ.

ރާއްޖޭގައި އެންމެ ފަހުން މީހެއްގެ މައްޗަށް މަރުގެ ޙުކުމް އިއްވައި، ޙުކުމް ތަންފީޒްކޮށްފައި ވަނީ، 7 އޭޕްރީލް 1953 ގައެވެ. އެފަހަރު މަރުގެ ހުކުމް ތަންފީޒްކޮށްފައި ވަނީ ހުވަދު އަތޮޅު އަތޮޅުވެރިޔާ މަރާލުމުގެ ކުށުގައި ނިލަންދޫ ޙަކީމް ދީދީގެ މައްޗަށެވެ. އޭނާގެ މައްޗަށް މަރުގެހުކުމް ތަންފީޒްކުރީ ބަޑިޖަހައިގެންނެވެ.