އެމްޑީޕީގެ ރިޔާސީ ޕްރައިމަރީ ނާކާމިޔާބުވެވަޑައިގެންނެވުމާއި އެކު ވެރިކަމަށް އާދެވޭނެ ގޮތެއް ހޯއްދެވުމަށް ރައީސް ނަޝީދު އެމްޑީޕީގެ ތެރޭގައި އުފެއްދެވި "ފިކުރެއްގެ ދިރުން" ފެކްޝަނުގެ ފަރާތުން ސިޔާސީ ޕާޓިއެއް އުފެއްދުމުގެ ހުއްދައަށް އެދި އިލެކްޝަންސް ކޮމިޝަނަށް ފޯމް ހުށައަޅައިފިއެވެ.

ރައީސް ނަޝީދަށް ވެރިކަން ހޯދައި ދިނުމަށް އަލަށް އުފެއްުދުމަށް ހުށައަޅާފައިވާ ޕާޓިގެ ނަމަކީ "ދި ޑިމޮކްރެޓްސް" އެވެ.

ޕާޓީ އުފެއްދުމުގެ ހުއްދައަށް އެދި ފޯމް ހުށައަޅާފައި ވަނީ މިއަދު މެންދުރު ފަހުއެވެ. އިލެކްޝަންސް ކޮމިޝަންގެ ފަރާތުން ފޯމާއި ހަވާލުވެވަޑައިގެންނެވީ، އިލެކްޝަންސް ކޮމިޝަންގެ މެމްބަރު އިސްމާޢީލް ޙަބީބެވެ.

އިލެކްޝަންސް ކޮމިޝަނަށް ފޯމު ހުށައެޅުއްވުމަށް ވަޑައިގެންނެވި އިރު ފިކުރެއްގެ ދިރުމަށް ތާޢީދުކޮށްގެން ތިއްބެވި ބޭފުޅުން އަޅުއްވައިގެން ތިއްބެވީ ވިލު ނޫކުލައިގެ ޓައީއެއް އަޅުއްވައިގެންނެވެ. 

ފިކުރެއްގެ ދިރުން ފެކްޝަނަށް ނިސްބަތްވާ މަޖިލިސް މެމްބަރުންގެ ތެރެއިން 12 މެމްބަރުން އެމްޑީޕީންވަކިވެވަޑައިިގެންފައި ވާއިރު އަދި އެއްމެމްބަރަކު ޕާޓިން ވަކިވެފައިވާ ކަމަށް އެމްޑީޕީގެ ފިޔަވަޅުއަޅާ ކޮމިޓީން ނިންމާފައި ވާއިރު ރައީސް ނަޝީދު އަދިވެސް ހުންނެވީ އެމްޑީޕީގައެވެ.

އެހެން ނަމަވެސް ކައިރިި މުސްތަޤުބަލެެއްގައި ރައީސް ނަޝީދުވެސް އެމްޑީޕީން ވަކިވެވަޑައިގެން އައުޕާޓީއާ ގުޅިވަޑައިގަންނަވާނެ ކަމަށް ވަނީ ބެލެވިފައެވެ.