ސައުދީ އަރަބިއްޔާގައި މިހާރު ކުރިޔަށްދާ ކްލަބް ވޯލްޑް ކަޕްގެ ސެމީފައިނަލް ދެވަނަ މެޗުގައި އަންގާރަ ދުވަހުގެރޭ ބައްދަލުކުރީ، 2022/23 ގެ ޗެމްޕިއަންސްލީގުގެ ޗެމްޕިއަނުންގެ ގޮތުގައި މުބާރާތަށް ދަތުރުކުރި އިނގިރޭސިވިލާތުގެ މެންޗެސްޓަރ ސިޓީ އާއި 2022 ވަނަ އަހަރުގެ އޭއެފްސީ ޗެމްޕިއަންސް ލީގު ކާމިޔާބުކޮށް މުބާރާތަށް ކޮލިފައިވި ޖަޕާންގެ އުރާވާ ރެޑްސްއެވެ.

ކިންގް އަބްދުﷲ ސްޕޯޓްސް ސިޓީ ސްޓޭޑިއަމްގައި ކުޅުނު މި މެޗު 3-0 އިން ކާމިޔާބުކޮށް، ފައިނަލުގެ ދެވަނަ ޖާގަ ކަށަވަރުކުރީ މެންސިޓީއެވެ. މިއީ މެންސިޓީއިން ކްލަބް ވޯލްޑް ކަޕްގައި ކުޅޭ ފުރަތަމަ ފަހަރެވެ.

މެންސިޓީއިން އުރާވާ ރެޑްކް ކޮޅަށް ކާމިޔާބުކުރި ފުރަތަމަ ގޯލަކީ އެ ޓީމުގެ ކުޅުންތެރިއެއްގެ އަތުން ބައިކޮޅަށް ވަތް ގޯލެކެވެ. އަދި އެ ގޯލު ފެނިގެން ދިޔައީ ވެސް ފުރަތަމަ ހާފުގެ އިތުރު ވަގުތު ކުޅެނިކޮށެވެ. މެންސިޓީގެ ގޯލުތައް ދެން ކާމިޔާބުކޮށްދިނީ މަޓެއޯ ކޮވަސިޗްއާއި ބަނާޑޯ ސިލްވާއެވެ. މެޗުގެ މޮޅު ކުޅުންތެރިއަކަށް ހޮވިފައިވަނީ މެންސިޓީގެ ރޮޑްރީއެވެ.

މެންސިޓީއާ ދެކޮޅަށް ފައިނަލްގައި ކުޅޭ ފްލުމިނެންސް އެފްސީ ފައިނަލަށް ދަތުރުކުރީ ސެމީގައި މިސްރުގެ އަލް އަހްލީ 2-0 އިން ބަލިކޮށްފައެވެ. ބްރެޒިލްއަށް ނިސްބަތްވާ ފްލުމިނެންސް މުބާރާތަށް ކޮލިފައިވީ ކޮންމެބޮލް ލިބަޓަޑޯސް، ނުވަތަ ދެކުނު އެމެރިކާގެ ޗެމްޕިއަނުންގެ ގޮތުގައެވެ. އަދި އަލް އަހްލީ ކޮލިފައިވީ ކަފް ޗެމްޕިއަންސް ނުވަތަ އެފްރިކާގެ ޗެމްޕިއަނުންގެ ގޮތަގައެވެ.

މި އަހަރުގެ ކްލަބް ވޯލްޑްކަޕްގެ ފައިނަލް ކުޅުމަށް ހަމަޖެހިފައިވަނީ 22 ޑިސެމްބަރ ވާ ހުކުރު ދުވަހުގެ ރޭގަނޑުއެވެ. އަދި މުބާރާތުގެ ތިންވަނަ ހޮވާ މެޗު ކުޅޭނީ ފައިނަލް މެޗުގެ ކުރިންނެވެ.

މި އަހަރުގެ މުބާރާތް މެންސިޓީއިން ކާމިޔާބުކުރުން ވާނީ ތާރީހީ ކަމަކަށެވެ. އެއީ 2000 ވަނަ އަހަރު މި މުބާރާތް ކުޅެން ފެށި ފަހުން މުބާރާތުގައި ވާދަކޮށްފައިވާ އެއްވެސް އިނގިރޭސި ކްލަބަކަށް، އެ ކްލަބުގެ ފުރަތަމަ ކްލަބް ވޯލްޑް ކަޕް މީގެ ކުރިން ކާމިޔާބުކުރެވިފައި ނުވާތީއެވެ. އެހެންކަމުން މެންސިޓީއަށް މުބާރާތް ކާމިޔާބު ކުރެވިއްޖެނަމަ އެ ޓީމު ވެގެންދާނީ ފުރަތަމަ ފަހަރަށް މުބާރާތުގައި ވާދަކޮށް، މުބާރާތް ކާމިޔާބުކުރާ ފުރަތަމަ އިނގިރޭސި ކްލަބަށެވެ.

މީގެ އިތުރުން މެންސިޓީއަށް ކާމިޔާބު ލިބިއްޖެނަމަ، މި ތަށި ވެގެން ދާނީ ގާޑިއޯލާގެ ކްލަބް ވޯލްޑް ކަޕް ހަތަރުވަނަ ތައްޓަށެވެ. މީގެ ކުރިން އެއްވެސް ކޯޗަށް މިހާ ގިނަ އަދަދަކަށް މި މުބާރާތް ކާމިޔާބު ކުރެވިފައެއް ނުވެއެވެ.