ރާއްޖޭގެ މިވަގުތު ދިރިއުޅޭ ބިދޭސީންގެ އަދަދުތަކާއި އެމީހުންގެ ތަފްސީލީ މަޢުލޫމާތުތައް، ކުރިއަށް އޮތް 1 އަހަރު ދުވަހުގެ ތެރޭގައި އެއްކޮށް، ފުރިހަމަކުރުމުގެ މަސައްކަތް ފަށްޓަވާފައިވާކަމަށް ދާޚިލީ ސަލާމަތާއި ފަންނިއްޔަތާބެހޭ ވަޒީރު ޢަލީ އިޙުސާން ވިދާޅުވެއްޖެއެވެ.

 ދާޚިލީ ސަލާމަތާބެހޭ ވަޒީރު ޢަލީ އިޙުސާނު ވިދާޅުވީ، އެކިއެކި މަސައްކަތްތަކުގައި ރާއްޖޭގައި ދިރިއުޅޭ ބިދޭސީންގެ ސައްޙަ މަޢުލޫމާތު ރައްކާކުރެވިފައި ހުރުމަކީ ކޮންމެހެން ކުރަންޖެހިފައިވާ ބޮޑު މަސައްކަތެއްކަމަށެވެ. މި އޮޕަރޭޝަނަކީ ދާޚިލީ ސަލާމަތާއި ފަންނިއްޔަތާބެހޭ ވުޒާރާއާއި އިމިގްރޭޝަން އަދި ކަމާއި ގުޅުންހުރި އިދާރާތައް ގުޅިގެން ފަށާފައިވާ މަސައްކަތެއްކަމަށް ވަޒީރު ވިދާޅުވިއެވެ.

އިޙުސާން ވިދާޅުވީ، މަސައްކަތްތެރިން ގެންނަ ކުންފުނިތަކުން ބިދޭސީންނާއި ގުޅޭ މަޢުލޫމާތު ގަވައިދުން ބެލެހެއްޓުމާއި، ކަމާއި ގުޅުންހުރި ފަރާތްތަކަށް ޖަވާބުދާރީ ވުމުގެ މަސައްކަތް ކުރާ މީހުން ނިސްބަތުން ވަރަށް މަދުކަމަށެވެ. އެގޮތުން މި މަޢުލޫމާތު ޤަވާއިދުން ބަލަހައްޓަނީ ގާތްގަނޑަކަށް %36 މީހުންކަމަށް ވަޒީރު ވިދާޅުވިއެވެ. މީގެތެރެއިން ބަންގްލަދޭޝްއަށް ނިސްބަތްވާ މަސައްކަތްތެރިންގެ ކަންކަން ގަވައިދުން ކުރިއަށްގެންދަނީ %50 މީހުންކަމަށްވެސް ވަޒީރު ވިދާޅުވިއެވެ.

ރާއްޖޭގައި ވޯކް ޕަރމިޓް ދޫކުރެވި މަސައްކަތް ކުރަމުންދާ ބިދޭސީގެ އަދަދުކަމަށް ނިޒާމުގެ ތެރެއިން ފެންނަންހުރީ 139000އެއްހާ މީހުންނެވެ. މީގެތެރެއިން ބަންގްލަދޭޝްއަށް ނިސްބަތްވާ މީހުންގެޢަދަދަކީ 90634 އެވެ.