އާދިއްތަ ދުވަހުގެރޭ ގައުމީ ބިލިއާޑް ސެންޓަރުގައި ކުޅުނު މިއަހަރުގެ ބިލިއާޑް "9 ބޯލް" އެސޯސިއޭޝަން ކަޕްގެ ޗެމްޕިއަންކަން އަހްސަން ހާޝިމް ހޯދައިފި އެވެ. މި ކާމިޔާބީއާއެކީ އޭނާވަނީ ރާއްޖޭގެ ޕޫލް ބިލިއާޑް ރޭންކިން އެއްވަނައަށް ކުރިއަށް ޖެހިލާފައެވެ.

ސެމީ ފައިނަލުގައި އަލީ ފަޔާޒް ބަލިކޮށް ފައިނަލުން ޖާގަ ހޯދި އަހްސަން ވާދަކުރީ ސެމީ ފައިނަލުގައި ފަތުހުﷲ ޖަމީލް ބަލިކޮށް ފައިނަލުން ޖާގަ ހޯދި މުޙައްމަދު ދުންޔާޒާއެވެ. ފައިނަލް މެޗު އަހްސަން ކާމިޔާބުކުރީ 11 ފްރޭމް 5 ފްރޭމުންނެވެ.

މި އަހަރުގެ މުބާރާތުގައި ޖުމްލަ 73 ކުޅުންތެރިން ވާދަކޮށްފައިވެއެވެ. އަދި މުބާރާތް ކުރިއަށް ގެންގޮށްފައިވަނީ 16 ގްރޫޕަކަށް ބަހާލައިގެންނެވެ. ނޮކްއައުޓް ބުރަށް 32 ކުޅުންތެރިން ކޮލިފައިވީ ގްރޫޕްގެ އެއްވަނަ އަދި ދެވަނަ ހޯދައިގެންނެވެ.