އެމްޑީޕީގެ ޓިކެޓްގައި މާލޭ ސިޓީގެ މޭޔަރު ކަމުގެ މަޤާމަށް ވާދަކުރައްވާ އާދަމް އާޒިމް، ސަންގު ޓީވީގެ ބަހުސްގައި ބައިވެރިވެވަޑައި ނުގެންނެވުަމަށް ނިންމެވީ މިނިވަން މޮޑާރޭޓަރެއް ނެތުމާއި، ހަތަރު ދުވަހަށް ބަހުސްކުރިޔަށްދާތީކަމުގައި، އެމްޑީޕީން ބުނެފިއެވެ.

ހަތަރު ރެއަށް ދެމިގެންދާގޮތަށް ސަންގު ޓީވީ އިންތިޒާމްކުރި ބަހުސްގައި މިރޭގެ މައުލޫއަކަށް ކަނޑައަޅާފައި އޮތީ ބޯހިޔާވަހިކަމެވެ. އަދި ބަހުސްގައި އާޒިމް ބައިވެރިވެވަޑައި ނުގަންނަވާނެކަން ދުރާލައި އެމްޑީޕީން ވަނީ ސަންގުޓީވީއަށް އަންގާފައެވެ.

އާދަމް އާޒިމް ބަހުސްގައި ބައިވެރިވެވަޑައިނުގެންނެވި ސަބަބު ހާމަކޮށް އެމްޑީޕީން ބުނީ، އެގޮތަށް ނިންމެވުމުގެ ސަބަބަކީ ސަންގުޓީވީ ބަހުސް މިނިވަން ކަމާއެކު ކުރިއަށް ގެންދިއުމަށް މިނިވަން މޮޑާރޭޓަރެއް ބަހައްޓައިދިނުމަށް އެދިފައިވުމާއެކުވެސް އެކަމަށް އެއްވެސް އިޖާބައެއް ނުލިބުމާއި، އިންތިޚާބު އޮންނަދުވަސް މިހާ ކުޑަތަންވެފައިވަނިކޮށް ހަތަރު ދުވަހަށް ދިގުދެމިގެންދާ ބަހުސެއްގައި މޭޔަރ ކެނޑިޑޭޓް ތާށިވުމަކީ ކެންޕޭނުންގައި ދެންކުރަން ހުންނަކަންތައްތަކަށް އަސަރުކުރާކަނެކަމަކަށްވާތީ ކަމަށެވެ. 

އެހެން ނަަމަވެސްމިޕާރޓީގެ މެޔަރ ކެނޑިޑޭޓް އާދަމް އާޒިމް 6 ޖެނުއަރީ 2023ގައި ބޭއްވުމަށް ހަމަޖެހިފައިވާ ޕީއެސްއެމްގެ ބަހުސްގައި ބައިވެރިވެ ވަޑައިގެންނަވާނެކަމުގައިވެސް އެމްޑީޕީން ވަނީ ބުނެފައެވެ.

ސަންގުޓީވީ 2023 ވަނަ އަހަރުގެ ރިޔާސީ އިންތިޚާބުގައި ކުރިޔަށް ގެންދިޔަ ބަހުސްގައިވެސް އެމްޑީޕީގެ ކެންޑިޑޭޓަށް ތަފާތުކޮށް، މޮޑަރޭޓަރ އިބްރާހިމް ވަހީދު (އަސްވާޑު) އަމަލުކުރިކަން ބައެއް ފަރާތްތަކުން ފާހަގަކޮށްފައިވެއެވެ. އަދި ރިޔާސީ އިންތިޚާބު ޑރ. މުޙައްމަދު މުޢިއްޒަށް ކާމިޔާބު ވުމަށްފަހުގައި، ސަންގު ޓީވީގެ ބަހުސް މޮޑަރޭޓްކުރެއްވި އިބްރާހިމް ވަހީދު (އަސްވާޑު) ވަނީ، ޔޫތު މިނިސްޓަރުގެ މަޤާމަށް ޢައްޔަނުކުރައްވާފައެވެ.

ސަންގުޓީވީގެ ބަހުސް މިރޭ ކުރިޔަށް ދިޔަ ވަގުތުގައި ހުޅުމާލެ ރުއްގަނޑު 1ގައި އާދަމް އާޒިމްގެ ކެމްޕޭން ހަރަކާތެއް ކުރިޔަށް ދިޔައެވެ. އެ ހަރަކާތުގައި ރާއްޖޭގެ ކުރީގެ ނައިބު ރައީސް ފައިޞަލް ނަސީމްވެސް ބައިވެރިވެވަޑައިގެންނެވިއެވެ.