ރައީސުލްޖުމްހޫރިއްޔާގެ އޮފީހުގެ ރަސްމީ އިންސްޓަގްރާމް އެކައުންޓުގައި ހުރި ކުރީގެ ރައީސް އިބްރާހީމް މުޙައްމަދު ޞާލިޙްގެ ފޮޓޯތަކާއިއެކު އެ އެކައުންޓްގައި ހުރި ކުރީ ސަރުކާރުގެ ހުރިހާ ފޮޓޯއެއް ނުފެންނަގޮތް ހަދައިފި

ރައީސުލްޖުމްހޫރިއްޔާގެ އޮފީހުގެ ރަސްމީ އިންސްޓަގްރާމްގައި ހުރި ފޮޓޯތައް ފޮހެލުމުގެ އިތުރުން، ކުރީ ސަރުކާރުގެ ދުވަސްވަރު ސަރުކާރުގެ މަޝްރޫއުތަކާއި އަދި ސަރުކާރުގެ ހަރަކާތްތަކާއި ގުޅޭ މައުލޫމާތުތައް ގެނެސްދިނުމަށް ބޭނުން ކުރި، ގަވްއެމްވީގައި ހުރި ހުރިހާ ޕޯސްޓްތަކެއްވެސް މިހާރު ވަނީ ޑިލީޓްކޮށްފައެވެ.

މިކަމާއި ގުޅޭ ގޮތުން ސުވާލު ދެންނެވުމުން، ރައީސުލްޖުމްހޫރިއްޔާގެ އޮފީހުގެ މިނިސްޓަރ އެޓް ދަ ޕްރެޒިޑެންޓްސް އޮފީސް ފޮރ ސްޓްރެޓީޖިކް ކޮމިއުނިކޭޝަން، އިބްރާހީމް ޚަލީލް، ވިދާޅުވީ، އެކަން ހިނގާފައިވާ ގޮތް ބެއްލެވި ކަމަށާއި، ކުރީ ސަރުކާރުގެ ދުވަސްވަރުގެ ފޮޓޯތައް އާއްމުންނަށް ނުފެންނަ ގޮތަށް މިހާރު ހުރީ އާކައިވްކޮށްފައި ކަމަށެވެ. އަދި ފޮޓޯތައް ޑިލީޓްކުރީ ނޫންކަމުގައިވެސް ޚަލީލު ވިދާޅުވިއެވެ.

ރައީސުލްޖުމްހޫރިއްޔާގެ އޮފީހުގެ ރަސްމީ އިންސްޓަގްރާމް އެކައުންޓަކީ، 8027 މީހުން ފޮލޯކުރާއެކައުންޓެކެވެ. އަދި ގަވްމެންޓްއެމްވީ (ގަވްއެމްވީ)އަކީ، 2958 މީހުން ފޮލޯކޮށްފައިވާ އެކައުންޓެކެވެ.