ރައްޔިތުންގެ މަޖިލީހުގެ ޤަވާއިދުގެ 49 ވަނަ މާއްދާއަށް ގެނައި އިސްލާޙްތަކަކީ، ޤާނޫނާއި ޚިލާފް އިސްލާޙްތަކެއް ކަމަށް ވިދާޅުވެ ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ޤާސިމް އިބްރާހީމް ރައްޔިތުންގެ މަޖިލީހުގެ ތަޅުމުގައި އަޑުގަދަކުރައްވައިފިއެވެ.

ރައްޔިތުންގެ މަޖިލީހުގެ ޤަވާއިދުގެ 49 ވަނަ މާއްދާއަށް ގެނައި، ބަދަލާއި އެކު އެމްޑީޕީގެ މެމްބަރުންނަށް އެކަނި، ރައީސުލްޖުމްހޫރިއްޔާ އާއި އެމަނިކުފާނުގެ ނައިބު މަޤާމުން ވަކިކުރެވޭ މިންވަރަށް ވޯޓު ހަމަވެއެވެ. މަޖިލީހުގެ ޤަވާއިދަށް ގެނައި އެންމެ މުހިއްމު ބަދަލަކީ، މަޖިލީހުގެ ނިންމުންތައް ނިންމުމުގައި، ރައްުޔިތުން މަޖިލީހުގެ މެމްބަރުންގެ އަދަދަކީ، މަޖިލީހުގައި ދެމި ތިބި މެމްބަރުންގެ އަދަދުކަމުގައި ކަނޑައެޅުމެވެ.

ރައްޔިތުންގެ މަޖިލީހުގެ ގަވާއިދުގެ 49 ވަނަ މާއްދާއަށް ހުށަހަޅާފައިވާ އިޞްލާޙުތައް، ޢާންމު ކޮމިޓީން ދިރާސާކޮށް ނިންމިގޮތުގެ ރިޕޯޓު ހުށަހަޅުއްވައި ބަހުސްގައިވެސް ވާހަކަފުޅު ދައްކަވަމުން ޤާސިމް ވިދާޅުވީ އެއީ ޤާނޫނު އަސާސީއާ ޚިލާފު އިސްލާޙްތަކެއް ކަމަށެވެ.

މަޖިލީހުގެ 42 މެމްބަރުންގެ އަޤުލަބިއްޔަތުން އެ އިސްލާޙްތައް ފާސްކުރުމާއިއެކު، މަޖިލީހުގެ ތަޅުމުގައި އަޑުގަދަކުރައްވައި، ޤާސިމް ވިދާޅުވީ، އެނިންމުން ޤާނޫނު އަސާސީއާ ޚިލާފު ކަމަށެވެ.

ޤާސިމް އަޑުގަދަކުރައްވަން ފެއްޓެވުމުން، ރައްޔިތުންގެ މަޖިލީހުގެ ރައީސް މުޙައްމަދު އަސްލަމް ވިދާޅުވީ، ކޮމިޓީ ރިޕޯޓް މަޖިލީހުގެ ތަޅުމަށް ގެންނާނީ، އެމައްސަލައެއް ޤާނޫނު އަސާސީ އާ ޚިލާފުތޯ ނުވަތަ ނޫންތޯ މަޖިލީހުގެ އިދާރީ މޭޒުން ނިންމަވާފައިކަމަށެވެ.

މަޖިލީހުގެ ޤަވާއިދުގެ 49 ވަނަ މާއްދާއަށް ހުށައަޅާފައިވާ އިސްލާޙްތައް ފާސްވުމާއިއެކުގައި މަޖިލީހުގެ ރައީސް ވަނީ މަޖިލީހުގައި މިހާރު ދެމިތިއްބެވި މެމްބަރުންގެ އަދަދަކީ، 80 ކަމުގައި މަޖިލީހުގެ ތަޅުމުގައި އިއުލާނުކުރައްވާފައެވެ. އަދި މީގެ އިތުރުން ރައްޔިތުންގެ މަޖިލީހުގެ ޖަލްސާތައް މިޑިސެމްބަރު މަހުގެ 28 ވަނަ ދުވަހާއި ހަމައަށް ކުރިޔަށް ގެންދިޔުމަށް ނިންމާފައިވާތީ މަޖިލީހުގެ ޖަލްސާއެއް ދެން ބާއްވާނޭ ތާރީޚް މެމްބަރުންނަށް އަންގަވާނެ ކަމުގައިވެސް މަޖިލީހުގެ ރައީސް ވަނީ އިޢުލާނުކުރައްވާފައެވެ.